ԼՂՀ ԱԳՆ-ն կշարունակի բանակցային գործընթացում Արցախի լիարժեք մասնակցության ապահովմանն ուղղված ջանքերը

Լեռնային Ղարաբաղի Հանրապետության արտաքին գործերի նախարարությունում մարտի 18-ին տեղի է ունեցել աշխատանքային խորհրդակցություն՝ ԼՂՀ արտաքին գործերի նախարար Կարեն Միրզոյանի գլխավորությամբ, որի ընթացքում ամփոփվել են գերատեսչության 2014թ. գործունեության արդյունքները:

Կարեն Միրզոյանը նշել է, որ նախորդ տարի ԼՂՀ ԱԳՆ շարունակել է հետևողական աշխատանքները ԼՂՀ միջազգային ճանաչման գործընթացում առկա դրական միտումների ամրապնդման և զարգացման ուղղությամբ:

Անդրադառնալով ադրբեջանա-ղարաբաղյան հակամարտության խաղաղ կարգավորման գործընթացին՝ ԼՂՀ արտաքին գործերի նախարարը նշել է, որ 2014թ. Ադրբեջանի իշխանությունների կողմից վարած ապակառուցողական քաղաքականության պատճառով չի հաջողվել այդ հարցում իրական առաջընթացի հասնել:

Կարեն Միրզոյանը վերահաստատել է, որ ԱԳՆ կշարունակի ջանքեր գործադրել՝ ուղղված բանակցային գործընթացի բոլոր փուլերին՝ կարգավորման փիլիսոփայության շուրջ կարծիքների փոխանակումից մինչև կոնկրետ քայլերի և պայմանավորվածությունների մշակումն ու իրագործումը, ԼՂՀ լիարժեք մասնակցության ապահովմանը:

Ընդգծվել է նաև միջազգային հանրությանը Արցախի մասին օբյեկտիվ տեղեկատվության ներկայացման, ինչպես նաև տարբեր երկրների և Սփյուռքի հետ երկկողմ համագործակցության հետագա զարգացման անհրաժեշտությունը:

Խորհրդակցության ընթացքում քննարկվել են հանրապետության նախագահի կողմից արտաքին քաղաքական գերատեսչության առջև դրված խնդիրների լուծման ընթացքը: ԼՂՀ ԱԳՆ ղեկավարը համապատասխան հանձնարարականներ է տվել գերատեսչության տարբեր ստորաբաժանումների պատասխանատուներին և կարևորել ավելի նախաձեռնողական դիվանագիտություն վարելու անհրաժեշտությունը: