«Ինչո՞ւ Հայաստան», որովհետև այն անակնկալ ինժեներական լուծումների երկիր է

Գործարկվել է whyarmenia.am կայքը, ուր տեղ են գտել Հայաստանի տեղեկատվական տեխնոլոգիաների ոլորտը ներկայացնող հիմնական գաղափարները` «Ինչո՞ւ Հայաստան» և «Անակնկալ ինժեներական լուծումների» հայեցակարգերը: Այս մասին «Արմենպրես»-ին հայտնեցին Ինֆորմացիոն տեխնոլոգիաների ձեռնարկությունների միությունից:

Միջազգային ասպարեզում Հայաստանի՝ որպես բարձր տեխնոլոգիաների երկրի կերպարի ձևավորման և զարգացման խնդիրը Ինֆորմացիոն տեխնոլոգիաների ձեռնարկությունների միության (ԻՏՁՄ) ռազմավարական գլխավոր ուղղություններից մեկն է:

Կայքում ներկայացված է հայկական ինժեներական և, մասնավորապես, բարձր տեխնոլոգիական մեծ ներուժը, հայերի նորարարությամբ զբաղվելու հազարավոր տարիների փորձը և շոշափելի ներդրումը համաշխարհային տեխնելոգիական զարգացման ոլորտում:

«Հայաստանը ինժեներական լուծումների հսկայական ներուժ ունի, որը համապատասխան կերպով չի ներկայացվում միջազգային շուկայում: Միջազգային գործարար շփումների ժամանակ հաճախ է հնչում այն հարցը, թե ինչու՞ պետք է համագործակցել հատկապես հայկական ընկերությունների հետ: Պատասխանը հստակ է, որովհետև Հայաստանը կարող է տրամադրել անակնկալ ինժեներական լուծումներ, որոնք աչքի են ընկնում որակով, կրեատիվությամբ և ճկունությանբ»,-նշում է ԻՏՁՄ գործադիր տնօրեն Կարեն Վարդանյանը:

Այս օրերին Գերմանիայի Հաննովեր քաղաքում ընթացող միջազգային CeBIT 2015 հեղինակավոր ցուցահանդեսում հայկական ընկերություններն արդեն ներկայանում են «Why Armenia?» և «Surprising Engineering» խորագրերի ներքո: