Երևանում կասկած ունեն Ղարաբաղի հարցով ԵԽԽՎ զեկուցողի կողմնակալության առնչությամբ

ՀՀ ԱԳ նախարար Էդվարդ Նալբանդյանը կասկածներ ունի, որ Ղարաբաղի հարցով Եվրախորհրդի խորհրդարանական վեհաժողովի (ԵԽԽՎ) զեկուցող, բրիտանացի պատգամավոր Ռոբերտ Ուոլթերն օբյեկտիվություն կդրսևորի:

«Արմենպրես»-ի փոխանցմամբ, ՀՀ ԱԳՆ-ում կայացած ասուլիսի ժամանակ, անդրադառնալով Ուոլթերի այցելությանը Բաքու, Նալբանդյանն ասաց, որ Հայաստանի մոտեցումն այս հարցում հայտնի է: «Պետք է զերծ մնալ քայլերից, որոնք կարող են վնասել եռանախագահների՝ կարգավոմանն ուղղված ջանքերին: Պետք է զերծ մնալ նոր կառույցներ, ձևաչափեր կամ աշխատանքային խմբեր ստեղծելուց, որոնք կվնասեն եռանախագահների գործունեությանը: Պետք է զերծ մնալ քայլերից, որոնք կվնասեն բանակցության խաղաղ կարգավորմանը»,- ասաց Էդվարդ Նալբանդյանը' հավելելով, որ պետք է զերծ մնալ նաև այնպիսի զեկուցողներից, որոնց կողմերից մեկը' Ադրբեջանը, ամենաբարձր մակարդակով անվերջ շնորհակալություն է հայտնում շարունակական աջակցության համար»,- ասաց Նալբանդյանը՝ հավելելով, որ այս պարագայում կողմնակալության հարց է ծագում, և ինքը չի կարծում, որ նման քայլերը օգտակար կլինեն: «Պետք է զգույշ լինենք, որ նուրբ գործընթացում վնաս չհասցվեն եռանախագահների ջանքերին, ովքեր ամեն ինչ անում են, որ հարցն ունենա խաղաղ կարգավորում»,- ասաց ՀՀ արտաքին գերատեսչության ղեկավարը' հավաստիացնելով, որ իր տեսակետը կիսում են նաև ԵԱՀԿ ՄԽ համանախագահները:

Մեծ Բրիտանիայի և Հյուսիսային Իռլանդիայի Միացյալ Թագավորության պատգամավոր Ռոբերտ Ուոլթերը նշանակվել է Լեռնային Ղարաբաղի իրադրության սրացման հարցերով Եվրախորհրդի խորհրդարանական վեժահաժողովի զեկուցող: Ուոլթերը միաժամանակ ԵԽԽՎ-ում բրիտանական պատվիրակության ղեկավարն է: Մարտի 12-13-ին Ուոլթերը այցելել է Բաքու: