«Ժողովուրդ». Վարդգես Գասպարին՝ «ՀԱԿ-ի մեծագույն անբարոյականության» մասին

«Ժողովուրդ» թերթը գրում է. «Armlur.am-ն արդեն մի քանի անգամ անդրադարձել է Ստրասբուրգում քաղաքական ապաստան ստացած նախկին քաղբանտարկյալ Գևորգ Մանուկյանի դեպքին և թե ինչպես են ՀԱԿ խմբակցության պատգամավորներ Գագիկ Ջհանգիրյանը և Լևոն Զուրաբյանը Գևորգ Մանուկյանից 500 ԱՄՆ դոլար գումար վերցրել, որպեսզի դիմում պատրաստեն և ուղարկեն Մարդու իրավունքների եվրոպական դատարան՝ իրեն հանիրավի բանտարկելու և կտտանքների ենթարկելու համար, սակայն այդպես էլ դիմումը չի գրվել, և այս մասին Գևորգն իմացել է արդեն Ստրասբուրգում՝ հենց Եվրադատարանից:

Իսկ ՀԱԿ իրավական աջակցության կենտրոնի համակարգող Արմեն Խաչատրյանը, պատասխանելով Մանուկյանին, հայտարարեց, թե վերջինս ստախոս է և միշտ աչքի է ընկել վատ վարքագծով: Թեմային իրավապաշտպան, քաղաքացիական ակտիվիստ Վարդգես Գասպարին ևս ծանոթ է:

Armlur.am-ի հետ զրույցում նա գործի հետ կապված ներկայացրեց այն, ինչին անձամբ տեղյակ է եղել: Գասպարիի խոսքով' Գևորգ Մանուկյանը մարտի 1-ի դեպքերից հետո, երբ հայտնվեց բանտում, այնտեղից դուրս գալուց հետո անընդհատ դիմում էր այդ նույն հարցով' արդյո՞ք դիմել են ՄԻԵԴ թե՞ ոչ:

«Դրանից հետո Գևորգը դիմեց ինձ այդ նույն հարցով: Այն ժամանակ ես քաղբանտարկյալների պաշտպանության հարցերով կոմիտեի անդամ էի: Ես դիմեցի ՀԱԿ անդամ Արմեն Խաչատրյանին նույն հարցով' գործը ուղարկե՞լ են, թե՞ ոչ: Եթե ուղարկել են, ապա պետք է որ փոստի ստացական գոյություն ունենա, ինչու՞ չեն տրամադրում այդ ստացականը Գևորգին: Նա ինչ-որ պատճառաբանություններ է բերել մոտ 1-2 տարի: Ես կարող եմ ասել, որ այս հարցը անտրամաբանական ու անհասկանալի էր: Դրանից անազնվություն էի զգում ես: Այս ամեն ինչը կարող է պարզվել, եթե ստացականը հանեն տրամադրեն նրան»,- ասաց Վ. Գասպարին և հավելեց, որ իրենից բացի նաև այլ մարդկանց է Գևորգը դիմել, ովքեր ևս դիմել են ՀԱԿ անդամ Արմեն Խաչատրյանին ու նույն «հեքիաթը լսել»:

Անդրադառնալով ՀԱԿ իրավական աջակցության կենտրոնի համակարգող Արմեն Խաչատրյանի հայտարարությանը, Գասպարին նկատեց' կարծես իրավաբանական մի ամբողջ խումբ նստել էր և այդ պատասխանը պատրաստել: «Այն, որ գնահատական են տվել, թե Գևորգը ստախոս է ու անբարոյական, ՀԱԿ-ի մեծագույն անբարոյականությունն է: Ես մինչև հիմա այդ մասին չեմ բարձրաձայնել, որովհետև հենց այդ քաղբանտարկյալների ցուցակում եղել են քրեական անցյալ ու քրեական ներկա ունեցող անձինք, «զոն նայողի» թափթփուկներն էին:

Դրանց ՀԱԿ-ը որևէ թթու բան չի ասել, որևէ գնահատական չի տվել այդ մասին: Իսկ հիմա նրա համար անբարոյական են այն մարդիկ, ովքեր իրենց բողոքը բարձրաձայնում են, մատնացույց են անում իրենց ոտնահարված իրավունքը, որը տեղի է ունեցել ՀԱԿ-ում: Այ դրանք են անբարոյական»,- մանրամասնեց Վարդգես Գասպարին: Նա ավելացրեց, որ Գևորգ Մանուկյանի պահանջն արդար է և վերջինս շատ ճիշտ տեղ է պահանջներ ներկայացնում»:

Մանրամասները՝ թերթի այսօրվա համարում