Թուրքիայում ամենավտանգվածը Մրենի յոթերորդ դարի հայկական հոշարձանախումբն է

Թուրքիայում վերջին տարիներին մշակութային ժառանգության նկատմամբ ավելացած ուշադրությունը տուրիզմի զարգացման խնդիր է հետապնդում: Այս մասին լրագրողների հետ հանդիպման ժամանակ հայտնեց ԻԿՕՄՕՍ/Հայաստան հասարակական կազմակերպության նախագահ Գագիկ Գյուրջյանը:

«Վերջին տարիներին Թուրքիայում ավելացան մշակութային ժառանգության վերականգման ու պահպանության խնդիրները, որոնք իրենք օգտագործում են տուրիզմի զարգացման նպատակով: Բոլորդ էլ գիտեք, ժամանակակից Թուրքիայի տարածքում ինչպիսի հարուստ ժառանգություն կա` շումերական, ասորական, ուրարտական և այլն: Իրենք ուզում են ձևակերպել, որ հանդուրժողական են բոլոր տեսակի ժառանգությունների նկատմամբ, որը միջազգային ասպարեզում բարձրացնում է նրանց իմիջը»,- «Արմենպրես»-ի փոխանցմամբ` ասաց Գագիկ Գյուրջյանը:

Անդրադառնալով Անիի հուշարձանախմբի, որն ընդգրկվել է ՅՈՒՆԵՍԿՕ-ի կողմից պահպանության նախնական ցանկերում, վերականգնման աշխատանքներին, Գագիկ Գյուրջյանը նշեց, որ հայ փորձագետները ևս հնարավորություն պետք է ունենան մասնակցելու այդ աշխատանքներին: «Երբ ժամանակին դժգոհում էինք արվող վերականգնումից, այս դեպքում մոտեցումները փոխվել են, կա միջազգային վերահսկողություն: Կատարվող աշխատանքները միջազգային նորմերին համապատասխան են: Բացի այդ` ԻԿՕՄՕՍ/Հայաստանը մի բանաձև էր պատաստել, որով Անիի վերականգնողական աշխատանքներում հայ մասնագետների ներգրավվածության պահանջ էր ներկայացվել: Այդ դիմումն ընդունվել է: Սա դրական քայլ է, բայց մեզ համար գոհացուցիչ չէ, քանի որ վերականգնողական աշխատանքների մեկնարկից հետո կհասկանանք, թե մեր փորձագետները ինչ մասով են ընդգրկվում»,-հայտնեց բանախոսը:

Գագիկ Գյուրջյանի խոսքով` Թուրքիայում հայկական հուշարձաններից ամենավտանգվածը Վանից Ղարս ընկած հատվածում առկա Մրենի յոթերորդ դարի հոշարձանախումբն է, որն արժանացել է թուրքական հասարակական կազմակերպությունների ուշադրությանը: «Նրանք միջազգային փորձագետների խումբ էին կազմել, որոնք նախանցյալ տարի ուսումնասիրեցին հուշարձանախումբը` ճանաչելով այն առավել վտանգված` ակնկալելով նույնիսկ հայ մասնագետների աջակցությունը»,-նշեց Գագիկ Գյուրջյանը: