Վաղը կկայանա Սևակի տուն-թանգարանին կից կառույցի` Զանգակատան բացումը

Արարատի մարզի Զանգակատուն համայնքում մարտի 21-ին կկայանա Պարույր Սևակի տուն-թանգարանին կից կառույցի' Զանգակատան բացման հանդիսավոր արարողությունը: Այն համընկնում է Պոեզիայի միջազգային օրվա հետ, ինչը նույնպես մեծ խորհուրդ ունի:

«Արմենպրես»-ի փոխանցմամբ' ՀՀ նախագահ Սերժ Սարգսյանի 2014 թվականի հունվարի 24-ի հանձնարարականով սկսված շինարարական աշխատանքներն ավարտվել են դեկտեմբերի վերջին, որի համար ծախասվել է շուրջ 35 մլն դրամ: Զանգակատունը կառուցվել է Ջիմ Թորոսյանի աշակերտ Էրիկ Օհանյանի նախագծով: Շինարարությունն սկսել է «Վահագն» ՍՊԸ-ն և ավարտին հասցրել' «Գևորգյան-Ներսիսյան» ՍՊԸ-ն:

Պարույր Սևակի տուն-թանգարանի տնօրեն Ավետիք Գրիգորյանի տվյալներով, Զանգակատուն են տեղափոխվել ֆոնդային նյութերը, որին կհաջորդեն նրանց մշակման, դասդասման, թվայնացման աշխատանքները: Կայուն ջերմաստիճանի առկայության շնորհիվ Սևակի ողջ գրական ֆոնդը վերջնականապես կփրկվի քայքայումից: Պատրաստ է նաև Զանգակատան վարչական շենքը, գիտաշխատողների աշխատասենյակը:

Տուն-թանգարանը գործում է 1981 թվականից: Ամեն տարի մեծանուն գրողի ծննդյան օրը' հունվարի 24-ին և մահվան օրը' հունիսի 17-ի կազմակերպվում են հիմնական միջոցառումները: Իրականացվում են նաև ընթացիկ միջոցառումներ' կապված որևէ ստեղծագործության հոբելյանական լինելու հետ: Տուն-թանգարանում պահվում են ավելի քան 700 գիտաօժանդակ նյութեր. գրքեր, լուսանկարներ, նամակներ, հոդվածներ, 340 միավոր անձնական իրեր:

Լիլիթ Մաճկալյան