«ԵՄ քաղաքապետերի դաշնագրին» միացել են Հայաստանի 10 քաղաքային համայնքների ղեկավարներ

ՄԱԿ-ի Կլիմայի փոփոխության շրջանակային կոնվենցիայի 21-րդ համաժողովին ընդառաջ, ՀՀ բնապահպանության նախարարությունում կազմակերպվել է կլոր սեղան «ԵՄ քաղաքապետերի դաշնագրին» միացած Հայաստանի 10 քաղաքային համայնքների ղեկավարների և համապատասխան գերատեսչությունների ներկայացուցիչների հետ:

Ողջունելով միջոցառման մասնակիցներին՝ ՀՀ բնապահպանության նախարար Արամայիս Գրիգորյանը տեղեկացրել է, որ ՄԱԿ-ի շրջանակային կոնվենցիայի կողմ երկրների 21-րդ համաժողովի նախապատրաստական ժամանակաշրջանում բոլոր անդամակցող երկրներին առաջարկվել է ներկայացնել սեփական դիրքորոշումները «Ազգային մակարդակով սահմանված նախատեսվող գործողությունների» վերաբերյալ, որոնք օգտագործելու են ապագա արձանագրության բովանդակության, այդ թվում ջերմոցային գազերի գլոբալ արտանետումների կրճատման ռեժիմի հստակեցման համար: Նախարար Արամայիս Գրիգորյանի խոսքով նախատեսվում է, որ 2020-ից սկսած՝ կոնվենցիային անդամակցող բոլոր երկրները պետք է ստանձնեն պարտավորություններ՝ կատարելով ջերմոցային գազերի արտանետումների կրճատման կամ սահմանափակման որոշակի գործողություններ: Գործողությունների մասին պետք է ներկայացվի թափանցիկ և հստակ տեղեկատվություն:

Հայաստանի Հանրապետությունը, կարևորելով արտանետումների կրճատման գլոբալ ջանքերը, կամավորության սկզբունքով իրականացնում է կլիմայի փոփոխության մեղմման ուղղված միջոցառումներ և կլիմայի փոփոխության խնդիրները հետևողականորեն ներառում իր ազգային զարգացման ծրագրերում:

Այս համատեքստում ՀՀ բնապահպանության նախարարությունը՝ որպես Կոնվենցիայի ազգային համակարգող գերատեսչություն, հրավիրել է քաղաքային համայնքների ղեկավարներին՝ քննարկելու ջերմոցային գազերի արտանետումների կրճատման խնդրում քաղաքների մասնակցությունը, ձեռքբերումներն ու առաջիկա անելիքները: Հանդիպումը կազմակերպվել է՝ հաշվի առնելով կլիմայի փոփոխության հիմնախնդրի լուծմանը նպատակաուղղված գործողություններում Հայաստանի քաղաքները ներգրավելու Եվրամիության ջանքերը, ինչպես նաև այդ քաղաքների ղեկավարների՝ ԵՄ քաղաքապետերի Դաշնագրին միանալու որոշումը:
Կլոր սեղանի ընթացքում քննարկվել են կլիմայի փոփոխության կոնվենցիայի զարգացումների ներքո՝ էներգաարդյունավետության և վերականգնվող էներգիայի խնդիրները, քաղաքների ներկայացուցիչներն անդրադարձել են այդ ուղղությամբ իրականացված աշխատանքներին ու առկա խնդիրներին, քննարկել արտանետումների կրճատման շեմը և առնչվող այլ հարցեր:
Ներկայում համաձայնագրին միացած 10 քաղաքներից Սպիտակը, Ծաղկաձորը և Վայքն արդեն մշակել են արտանետման ծավալների կրճատմանն ուղղված ծրագրեր, իսկ մնացած քաղաքները գտնվում են մշակման տարբեր փուլերում: Հանդիպման ավարտին նախարար Արամայիս Գրիգորյանը նշել է, որ նախարարությունն իր լիազորությունների շրջանակներում պատրաստ է աջակցելու նրանց՝ ստանձնած պարտավորությունների կատարման հարցում: