Ապրիլի 24-ին Ֆրանսուա Օլանդը 120 հոգանոց պատվիրակությամբ կայցելի Ծիծեռնակաբերդ

Ֆրանսիան Հայոց ցեղասպանության ոգեկոչման արարողությանը կմասնակցի երկրի ղեկավարի մակարդակով և այդ մասնակցությունն իր մեջ կպարունակի երեք կոչ' հիշողություն, հարգանքի տուրք զոհերին հիշատակին և պատասխանատվություն, որպեսզի հետագայում նման սարսափելի դեպքերը իրադարձություններն այլևս չկրկնվեն: Այս մասին հայտարարեց Հայաստանում Ֆրանսիայի արտակարգ և լիազոր դեսպան Ժան Ֆրանսուա Շարպատիեն: «Արմենպրես»-ի հարցին ի պատասխան Հայաստանում Ֆրանսիայի դեսպանն ասաց, որ ներկա դրությամբ Հայաստանում Ֆրանսիայի դեսպանատունն աշխատում է Օլանդի այցի կազմակերպման շուրջ: «Ֆրանսուա Օլանդը բավական մեծ' մոտավորապես 120 հոգանոց պատվիրակությամբ կժամանի Երևան: Ստույգ կազմի մասին դեռևս տեղեկություններ չկան: Պարզապես կարող եմ ավելացնել, որ Ֆրանսիայի հայ համայնքի ներկայացուցիներ ներգրավված կլինեն այդ պատվիրակության կազմում»,- ասաց Շարպ ատիեն:

Ապրիլի 24-ին հիշատակվում է Օսմանյան Թուրքիայի իրագործած Հայոց ցեղասպանության 100-րդ տարելիցը: Հայաստան կժամանեն բազմաթիվ պատվիրակություններ աշխարհի տարբեր պետություններից: Հայաստան այցելելու մասին հայտարարություններ են արել Ֆրանսիայի նախագահ Ֆրանսուա Օլանդը և Ռուսաստանի նախագահ Վլադիմիր Պուտինը: