Երևանի պոլիկլինիկաները համալրվում են նոր բուժսարքավորումներով

Երևանի քաղաքապետ Տարոն Մարգարյանի նախաձեռնությամբ արդեն երրորդ տարին է, որ Երևանի քաղաքապետարանի ենթակայության պոլիկլինիկաները վերազինվում են նոր, թանկարժեք բուժսարքավորումներով։ Ինչպես տեղեկացնում են Երևանի քաղաքապետարանի տեղեկատվության և հասարակայնության հետ կապերի վարչությունից, Երևանի համայնքային բ յուջեով իրականացվող ծրագրով այս տարի ձեռք է բերվելու 4 բուժսարքավորում՝ 5 ուլտրաձայնային հետազոտման սարք, 10 ճեղքային լամպ, 5 կոլպոսկոպ, 10 արյան կլինիկական անալիզատոր:

2015 թվականի առաջին եռամսյակում մի շարք պոլիկլինիկաներ արդեն ստացել են նոր սարքավորումները. մասնավորապես, թիվ 1, 8, 17 պոլիկլինիկաները, «Նոր Արաբկիր» ԱԿ, «Սուրբ Աստվածամայր» ԲԿ ՓԲԸ-ները համալրվել են վերջին սերնդի ուլտրաձայնային հետազոտման ստացիոնար սարքերով՝ յուրաքանչյուրը տվիչով և դոպլերով։ Արյան կլինիկական անալիզատորներ են ստացել թիվ 1, 4, 13, 20, 22 պոլիկլինիկաները, «Կ. Եսայանի անվան» պոլիկլինիկա, «Նոր-Արեշ» պոլիկլինիկա, «Սարի թաղ պոլիկլինիկա», «Արշակունյաց պոլիկլինիկա», «Նորագավիթ պոլիկլինիկա» ՓԲԸ- ները:

«Բնակչության բուժսպասարկման որակը բարելավելու և առավել մատչելի դարձնելու, ինչպես նաև ամբուլատոր-համաբուժարանական հաստատությունների հագեցվածությունը մեծացնելու առումով այսօր քաղաքապետարանը մեծ ներդրում ու աշխատանք է կատարում, քանի որ շարունակական այս ծրագրով աստիճանաբար լուծվում է մի խնդիր, որ կարելի է հետխորհրդային ծանր ժառանգություն որակել։ Այսօր քաղաքապետարանը փորձում է բարձրացնել առողջապահական առաջնային օղակի՝ պոլիկլինիկաների դերը, նշանակությունը՝ բարձրացնելով այս բուժհաստատությունների գործառնական որակը»,- նշ ել է Երևանի քաղաքապետարանի աշխատակազմի առողջապահության վարչության պետ Կամսար Բաբինյանը:

Առաջիկայում Երևանի քաղաքապետարանի ենթակայության մի շարք պոլիկլինիկաներ ևս կհամալրվեն նոր սարքավորումներով՝ գինեկոլոգիական կաբինետները՝ աչքի կոլպոսկոպերով, ակնաբուժական կաբինետները՝ ճեղքային լամպերով։