Հայ դպրոցականները սիրով են գիրք ընթերցում. Մեկնարկում է Մանկապատանեկան գրքի շաբաթը

Հայ դպրոցականները սիրով են ընթերցում և կապված են գրքին:

Հայաստանի գրողների միության նախագահ Էդվարդ Միլիտոնյանը համոզված է՝ շատ կարևոր է, որ նման միտում դիտվում է բոլոր դպրոցականների շրջանում: ՀԳՄ նախաձեռնությամբ մարտի 26-ից ապրիլի 2-ը Հայաստանում կանցկացվի Մանկապատանեկան գրքի շաբաթ:

«Մանկապատանեկան գրքի շաբաթ իրադարձությունը վերականգնվեց այն ժամանակ, երբ Անդրանիկ Մարգարյանը Հայաստանի վարչապետն էր: Նրան դիմեցինք շաբաթը վերականգնելու առաջարկով, վարչապետը սիրալիր ընդունեց դա, և ինքն էլ ներկա էր բացմանը, մշտապես հետաքրքրվում էր գրականության պահպանման և տարածման խնդիրներով: Մանկապատանեկան գրքի շաբաթն առաջին օրերից իր առջև մի խնդիր դրեց՝ միջոցառման բացումը կատարել որևէ մարզում: Այդպես շարունակելու ենք հետագայում ևս»,- «Արմենպրես»-ի փոխանցմամբ՝ նշեց Էդվարդ Միլիտոնյանը:

ՀԳՄ նախագահի խոսքով՝ մանկական գիրքը սիրելի է հանրապետությունում, և այս առաքելության նպատակը նաև մանկական գրքերը մարզի ընթերցողներին մոտեցնելն է: «Մանկապատանեկան գրքի շաբաթը բացվելու է մարտի 26-ին Վայքի մշակույթի տանը: Բացմանը կմասնակցեն ուսուցիչներ, դպրոցականներ, տեղի գրողները: Այս տարի նշում ենք մանկագիր Երվանդ Պետրոսյանի հոբելյանը, ուզում ենք Գրողների միության դահլիճում նշել նրա 75-ամյակը»,- նշեց Միլիտոնյանը՝ հավելելով, որ շաբաթվա ընթացքում նախատեսված են գրքերի շնորհանդեսներ, տարբեր միջոցառումներ:

«Ամեն տարի մանկական գրականության տպագրության ուղղությամբ որոշակի քայլեր են արվում, պետպատվերով հրատարակվում են մեր մանկագիրների գործերը և տարածվում հանրապետության գրադարաններում: Բազմաթիվ դպրոցներում տարվա ընթացքում հանդիպումներ եմ ունենում և տեսնում եմ, որ դպրոցականները շատ սիրով կապված են գրքին, վերլուծում են, ընթերցում, և ամենուրեք է այդպես: Պետք է հորդորենք, որ ուսուցիչները և ծնողները դպրոցականներին ուղղորդեն դեպի լավ գրականությունը: Շատ երկրներում ուսուցիչները տեղեկացնում են նոր լույս տեսնող գրականության մասին: Բացի դրանից, շատ կարևոր է նաև, որ դպրոցականների համար հրատարակվող թերթերն ու ամսագրերը հասանելի լինեն նրանց: Նման թերթերում են տպագրվում երեխաների գործերը, և դա շատ կարևոր է, քանի որ այդ միջոցով ևս նրանք կապվում են գրքին և ընթերցանությանը»,- եզրափակեց Միլիտոնյանը: