«Էմմի»-ի մրցանակաբաշխությունը դիտել են ռեկորդային փոքր թվով հեռուստադիտողներ

Լավագույն հեռուստատեսային աշխատանքների համար «Էմմի» մրցանակի հանձնման արարողությունը դիտել է 11,3 մլն մարդ, ինչը ամենացածր ցուցանիշն է: Այդ մասին հայտնել է «Ասոշիեյթեդ պրես» գործակալությունը՝ հղում անելով Nielsen սոցիոլոգիական մարկետինգային ընկերության կողմից ստացված տվյալները:

Այդ տվյալների համաձայն՝ պարգեւատրման արարողությունը ամենափոքր հեռուստալսարանն է ունեցել նման գնատումների սկզբից ի վեր: Անցյալ տարի հեռուստալսարանը 11,9 մլն հանդիսական է արձանագրել:

Հեղինակավոր արձանիկների հանձնման 68-րդ արարողությունը սեպտեմբերի 18-ին կայացել է Լոս Անջելեսի (Կալիֆոռնիայի նահանգ) Microsoft թատրոնում: Գլխավոր պարգեւի (Primetime Emmy Awards) դափնեկիր է դարձել «Գահեր խաղը» (Game of Thrones) սերիալը: Այն մրցանակը նվաճել է «Լավագույն դրամատիկական սերիալ» կատեգորիայում՝ առաջ անցնելով «Ամերիկացիները» (The Americans), «Ավելի լավ է զանգահարեք Սոուլին» (Better Call Saul), «Դաունթոնի աբբայությունը» (Downton Abbey), «Հայրենիք» (Homeland), «Թղթե տնակ» (House of Cards) եւ «Պարոն Ռոբոտ» (Mr. Robot) սերիալներից:

Երկրորդ տարին անընդմեջ «Լավագույն կատակերգական սերիալ» է ճանաչվել «Փոխնախագահը» (Veep):

«Լավագույն մինի-սերիալ» անվանակարգում արձանիկը նվաճել է «Հանցագործությունների ամերիկյան պատմությունը» (The People V. O. J. Simpson: American Crime Story): «Լավագույն հեռուստաֆիլմ» է ճանաչվել «Շեռլոք» (Sherlock) բրիտանական հայտնի սերիալի դրվագը, որը կրում է «Այլանդակ հարսնացուն» (The Abominable Bride) վերնագիրը, հաղորդել է ՏԱՍՍ-ը: