Օրբանն առաջարկել է միգրանտներին ուղարկել ԵՄ-ի սահմաններից դուրս գտնվող ճամբարներ

Հունգարիայի վարչապետ Վիկտոր Օրբանն Origo ինտերնետ-հրատարակությանը տված հարցազրույցում հայտարարել է, որ Եվրամիությունը պետք է արտաքսի բոլոր անօրինական միգրանտներին:

Հունգարական կառավարության ղեկավարի խոսքով՝ կա միայն մեկ լուծում, որը ձեռնտու կլինի ԵՄ-ի բոլոր երկրներին, ներառյալ Գերմանիան, որը միգրանտների հետ կապված խնդիրներ ունի: «Նրանք, ովքեր անօրինականորեն են եկել մեզ մոտ, անհրաժեշտ է բռնել եւ հետ ուղարկել,-առաջարկել է Հունգարիայի վարչապետը:-Մենք պետք է փախստականների համար մեծ ճամբարներ ստեղծենք ԵՄ-ի սահմաններից դուրս, զինված պահակախմբով, Եվրամիության կողմից հատկացվող փողերով:

Յուրաքանչյուրը, ով մեզ մոտ կգա անօրինականորեն, պետք է բռնվի եւ ուղարկվի այդ ճամբարներ, եւ այնտեղ նրանք կարող են ներկայացնել փախստականի կարգավիճակ ստանալու խնդրագիր: Ճամբարները կարելի կլիներ տեղակայել որեւէ կղզում կամ հյուսիսաֆրիկյան ծովափին որեւէ տեղ: Նրանց պահպանությունը եւ հովանավորումը կընկնի Եվրամիության ուսերին, բայց դա համընկնում է մեր շահերին»:

Հոկտեմբերի 2-ին Հունգարիայում տեղի կունենա հանրաքվե: Քվեարկողները պետք է պատասխանեն հետեւյալ հարցին. «Համաձայն եք դուք արդյոք, որ Եվրամիությունը Հունգարիայի տարածք հունգարական քաղաքացիություն չունեցող քաղաքացիների ժամանման պարտադիր բաժնաչափեր սահմանելու իրավունք ստանա՝ առանց Հունգարիայի խորհրդարանի համաձայնության»: