5,3 մագնիտուդ ուժգնությամբ երկրաշարժ է տեղի ունեցել Ռումինիայում

Ուժեղ երկրաշարժ է տեղի ունեցել Ռումինիայում սեպտեմբերի 24-ին ժամը 02:11-ին (տեղի ժամանակով): Ուժգնությունը հասել է 5,3 մագնիտուդ:

Ինչպես հաղորդում է ՏԱՍՍ-ը, այս մասին տեղեկացնում է երկրաֆիզիկայի Ազգային ինստիտուտը։ Այն սկզբում հայտնել է 5,6 մագնիտուդի մասին, իսկ մի փոքր ավելի ուշ ճշգրտել է՝ 5,3։ Ստորգետնյա ցնցումների էպիկենտրոնն եղել է Վրանչա շրջանում, իսկ օջախը՝ 88,4 կմ խորության վրա։ Երկրաշարժը զգացվել է Ռումինիայի ամբողջ տարածքում, ինչպես նաև Ուկրաինայում և Մոլդովայում։

Զոհերի և փլուզումների մասին չի հայտնվում։ Արտակարգ իրավիճակների նախարարության հաղորդմամբ, մինչև այս պահը օգնության համար դիմողներ չեն եղել։ Այնուամենայնիվ, բնակիչները հետաքրքրվել են, թե արդյոք հարկավո՞ր է լքել իրենց տները։

Տարվա սկզբից Ռումինիայում գրանցվել է 4 ստորգետնյա ցնցում՝ 4 մագնիտուդ ուժգնությամբ։ Բոլոր չորս ցնցումների էպիկենտրոնը եղել է Վրանչայում։ Հայտնում են, որ միայն սեպտեմբերին եղել է 25 ցնցում՝ 2,5-4,3 մագնիտուդ ուժգնությամբ։ Ռումինիայում ամենաուժեղ երկրաշարժը վերջին տարիներին եղել է 2014 թվականի նոյեմբերի 22-ին՝ 5,7 մագնիտուդ ուժգնությամբ: