Տիգրան Մուկուչյանը՝ ԼՂՀ ընտրությունների մասին

Lurer.com-ի զրուցակիցն է ՀՀ ԿԸՀ նախագահ Տիգրան Մուկուչյանը:

- Պարոն Մուկուչյան, ինչպե՞ս կգնահատեք Լեռնային Ղարաբաղում հուլիսի 19-ին ացկացված նախագահական ընտրությունները։

- Իմ կարծիքով՝ ընտրությունները կազմակերպվել են Ընտրկան օրենսգրքի պահանջներին լիակատար համահունչ: Այն միանշանակ համապատասխանել է ընտրական իրավունքի համար միջազգայնորեն ճանաչման բոլոր ստանդարտներին:

- ՀՀ-ն ի՞նչ սովորելու բան ունի Արցախից՝ ընտրությունների անցկացման առումով։

- Նկատի ունենալով, որ ես ԿԸՀ նախագահ եմ՝ ես ինքս ղեկավարում եմ ՀՀ ԿԸՀ-ն, դրա համար կոռեկտ չեմ համարում ոչ նման հարցադրում, ոչ էլ իմ կողմից հնչեցվելիք պատասխան:

- Պարոն Մուկուչյան, նշեք մի քանի տարբերություններ և նմանություններ ՀՀ և ԼՂՀ ընտրությունների միջև։

- Ընդհանուր առմամբ ընտրական գործընթացն ըստ էության կազմակերպվում է նույն եղանակներով՝ ինչ որ մեր օրենսդրությամբ: Պետք է նկատել, որ ձևավորվում են նորից եռաստիճան ընտրական հանձնաժողովներ, սակայն, ի տրաբերություն մեզ մոտ հանձնաժողովների կազմավորման սկզբունքների, իրենց մոտ կազմավորման սկզբունքներն այլ են: Համակարգն ընդհանուր եռաստիճան է, այսինքն՝ տեղամասային ընտրական հանձնաժողովներ, մեր ընտրատարածքային կոչվածը իրենց մոտ կոչվում է տերիտորիալ հանձնաժողով և Կենտրոնական ընտրական հանձնաժողովը: Բնականաբար ԿԸՀ-ի դերը, ինչպես և ցանկացած ընտրական համակարգում ընդհանուր ընտրությունների կազմակերպումն ու անցկացման պատասխանատվությունն է և այդ ամբողջ կազմակերպչական աշխատանքներն իրականացումը:

Մեր քվեարկության կազմակերպման գործընթացում մենք օգտագործում ենք ծրարներ, իրենց Ընտրական օրեսգրքի համաձայն՝ ծրարների օգտագործում չկա: Պետք է նկատել, որ դրանք հիմնականում տեխնիկական խնդիրներ են: Ինչ վերաբերում է ընդհանուր սկզբունքներին, այսինքն՝ համընդհանուր ճանաչում գտած սկզբունքներին՝ թափանցիկություն, հրապարակայնություն, ընտրական գործընթացների նկատմամաբ հասարակական վերահսկողություն դիտորդների, հասարակական կազմակերպությունների, ԶԼՄ-ների կողմից և, ինչու չէ, նաև ընտրողների կողմից, արդյունքների ամփոփման հրապարակայնության ապահովում, այս ամբողջը լիարժեք կերպով ըստ էության  իրականացման մեխանիզմները գուցե տարբերվում են, բայց ընդհանուր սկզբունքների առումով թերևս կարելի է համարել, որ նույնն են:

- ԼՂՀ ԿԸՀ-ից մեզ հայտնել են, որ ընտրության օրը ընտրախախտումների վերաբերյալ ահազանգեր չեն եղել: Մեզ մոտ մայիսի վեցին անցկացվեցին խորհրդարանական ընտրություններ, որի ժամանակ ահազանգերը շատ եղան: Ինչո՞վ կպայմանավորեք դա:

- Սկզբունքորեն պետք է նկատել նախ՝ առաջին, որ մեզ մոտ ընտրողների թիվն ավելի մեծ է, բնականաբար, եթե ավելի շատ ընտրողներ  են մասնակցում ընտրություններին, ենթադրվում է, որ կարող են լինել նաև որոշակի ահազանգեր հատկապես քվեարկության օրը՝ կապված առանձին անձանց կողմից Ընտրական օրենսգրքի պահանջների ոչ լիարժեք իրականցման հետ: Պետք է նկատել մի կարևորագույն հանգամանք. իհարկե, եթե սահմանափակ ժամանակահատվածում բավականին մեծ թվով մարդիկ (նկատի ունեմ տասնյակ հազարավոր ընտրողներ), մտնում են իրավահարաբերությունների մեջ, բնական է՝ հնարավոր են նաև այդ մեկ օրվա ընթացքում իրավահարաբերություններ, որոնցում, օրինակ, առկա են լինում այս կամ այն ոչ հստակ վարքագիծը, կամ այս կամ այն խախտումը և այլն: Բայց ընդհանուր առմամբ, եթե մենք խոսում ենք ընտրությունների մասին, պետք է միշտ գնահատենք մի կարևորգույն բան, որ արդյո՞ք իրականացված ընտրությունները լիարժեք կերպով համապատասխանում են ընտրողների տված ձայներին և արդյո՞ք ընտրողների կամարտահայտության արդյունքը լիարժեք կերպով արտացոլվում է ընտրական արդյունքում: Այս առումով ես կարծում եմ, որ մեզ մոտ և ԼՂՀ-ում անցկացված ընտրությունները թերևս որևէ տարբերություն չունեին:

Ազատուհի Արասխանյան