Դանիայում հունիսի սկզբին կհանվեն COVID-19-ով պայմանավորված գրեթե բոլոր սահմանափակումները․ Copenhagen Post

Դանիական քաղաքական կուսակցությունները որոշել են հունիսին վերացնել գրեթե բոլոր սահմանափակումները, որոնք կապված են կորոնավիրուսի տարածման հետ, հայտնում են տեղական լրատվամիջոցները:
Հունիսի 8-ից երկիրը կսկսի վերացնել սահմանափակումների «երրորդ փուլը». Դանիայում կբացվեն կենդանաբանական այգիները, դպրոցները, թանգարանները, թատրոնները, պատկերասրահները, կինոթատրոնները, կվերականգնվի ամառային ժամանցը: Այնուհետև մինչև 50 մարդ կկարողանա հավաքվել միևնույն վայրում:
«Չորրորդ փուլը» կսկսվի օգոստոսի սկզբին: Իշխանությունները կբացեն համալսարաններ և ուսումնական այլ հաստատություններ, գիշերային ակումբներ և դիսկոտեկներ, մարզադահլիճներ, ջրաշխարհներ և լողավազաններ: Միակ էական սահմանափակումը, որը ուժի մեջ կմնա մինչև օգոստոսի վերջ, ավելի քան 500 մարդու մասնակցությամբ միջոցառումների արգելքն է: Մայիսին սահմանափակումները կշարունակվեն կիրառվել։ Մասնավորապես, սոցիալական հեռավորությունը պահպանելու պահանջները կպահպանվեն։ Մայիսի 11-ից երկիրը կբացի խանութներ և առևտրի կենտրոններ սահմանափակ ռեժիմով: Միևնույն ժամանակ, սրճարաններն ու ռեստորանները, ինչպես նաև բարերն ու պանդոկները կսկսեն գործել Դանիայում մայիսի 18-ից, բայց հաստատություններում մարդկանց թիվը դեռ սահմանափակ է: Ուսանողները կկարողանան վերադառնալ ուսումնական հաստատություններ։ Նաև երկրում կբացվեն դպրոցներ և գրադարաններ, բայց սահմանները կմնան փակ, որպեսզի օտարերկրացիները մուտք չգործեն երկիր գոնե մինչև հունիսի 1-ը: Վերջին տեղեկությունների համաձայն՝ Դանիայում հայտնաբերվել է վարակի 10 083 դեպք, որից 7 711 մարդ վերականգնվել է, 514-ը՝ մահացել: