Ամերիկացին վարակվել է ուղեղով սնվող ամեոբայով

ԱՄՆ-ի բնակիչը վարակվել է հազվագյուտ մակաբույծով, որն ուտում է մարդու ուղեղը: Դեպքը տեղի է ունեցել Ֆլորիդայում: Այս մասին գրում է Lenta.ru-ն` հղում անելով  Sky News-ին, որն էլ իր հերթին վկայակոչում է տեղի առողջապահության աշխատակիցների հայտարարությանը:

Նահանգի Առողջապահության դեպարտամենտը հայտարարել է, որ մեկ մարդ Հիլսբորո շրջանում վարակվել է Naegleria fowleri-ով (ամեոբա, որը որոշակի պայմաններում կարող է ախտահարել մարդու ուղեղը): Տղամարդու վիճակի մասին որևէ տեղեկություն չի հաղորդվում:

Ֆլորիդայի առողջապահության դեպարտամենտը նահանգի բնակիչների համար հրապարակել է զգուշացում: «Հիշե՛ք, որ այդ հիվանդությունը հազվադեպ է հանդիպում, և կանխարգելման արդյունավետ ռազմավարությունները կարող են ապահովել անվտանգ ամառային լողի սեզոն»,- հայտարարել են դեպարտամենտում:

Naegleria fowleri-ն սովորաբար հանդիպում է տաք, մաքուր ջրի մեջ, ինչպիսիք են լճերը, գետերը և տաք աղբյուրները և օրգանզիմ է  թափանցում քթի միջոցով: Այնտեղից ամեոբան մտնում է ուղեղ՝ պատճառելով ինֆեկցիա, որը սովորաբար հանգեցնում է մահվան: Վարակման ախտանիշներն են` գլխացավը, տենդը, սրտխառնոցը, ապակողմնորոշվածությունը, փսխումը, ջղակծկումը, հավասարակշռության կորուստը և հալյուցինացիաները: