Զելենսկին հայտնել է, թե որն է Պուտինի հետ հանդիպելու համար իդեալական վայրը

Ուկրաինայի նախագահ Վոլոդիմիր Զելենսկին իտալական la Repubblica թերթին տված հարցազրույցում ասել է, որ Վատիկանը կարող է դառնալ «օպտիմալ վայր» Ռուսաստանի հետ Դոնբասի շուրջ բանակցությունների համար: «Սուրբ Աթոռը գլոբալ բարոյական հեղինակություն է, որը միշտ արդյունավետորեն հանդես է գալիս որպես միջնորդ՝ լինելով անկողմնակալ և վստահելի հակամարտության բոլոր կողմերի համար: Այդ իսկ պատճառով՝ Վատիկանը պատմության մեջ հաճախ է կանչվել՝ լուծելու հակամարտությունները պետությունների միջև խաղաղ ապագայի համար,֊ասել է Զելենսկին։ Ինչպես հայտնի է, անցյալ շաբաթ Ուկրաինայի առաջնորդը իր ռուս գործընկերոջը հրավիրել էր «հանդիպելու ուկրաինական Դոնբասի ցանկացած վայրում, որտեղ պատերազմ ընթանում է»: Վլադիմիր Պուտինն իր հերթին պատասխանել էր, որ ինքը պատրաստ է Զելենսկուն ընդունել Մոսկվայում, եթե նա ցանկանում է քննարկել երկկողմ օրակարգը: Առանձնահատուկ շեշտվել էր, որ այդ օրակարգը չի ներառում ոչ Ղրիմը, ոչ էլ Դոնբասը: Երկուշաբթի օրը Ուկրաինայի նախագահը ասել էր, որ ամեն ինչ գնում է նրան, որ Պուտինի հետ հանդիպում տեղի կունենա, իսկ ժամն ու տեղն արդեն մանրուք են: Կրեմլը հաստատել է, որ պետությունների ղեկավարների վարչակազմերը մշտական ​​կապի մեջ են: