Ինչպես մենք ենք ամեն վայրկյան սպասում նոր գործողությունների, նույն կերպ էլ Լեհաստանն ու ԱՄՆ-ն. պետք է պատրաստ լինել վատագույնին. Աղազարյան

Միանշանակ ոչինչ չեմ կարող ասել, բոլորիս համար էլ ակնհայտ է Ադրբեջանի դիրքորոշումը: Պարզ է, որ իրենք բավարարված չեն պատերազմի արդյունքներով և բնականաբար իրենց նպատակը այդքանը վերցնելը չէր: Այս մասին ԼՈՒՐԵՐ.com-ի հետ զրույցում ասաց իմքայլական պատգամավոր Հովիկ Աղազարյանը:

Նա ասաց, որ պետք է պատրաստ լինել վատագույնին. «Մենք մեր ողջ ուժերը պետք է համախմբենք և ամեն գնով պաշտպանենք մեր հայրենիքը: Այն, թե ինչ վիճակում ենք գտնվում պատերազմից հետո նշանակություն չունի. պետք է պաշտպանենք մեր երկիրը և պատրաստ լինենք իրադրության ամեն զարգացման»,- ասաց պատգամավորը:

Մեր այն հարցին, թե իրենից ինչ էր ներկայացնում ԱՄՆ-ի և Լեհաստանի հայտարարությունը, որով հորդորում են իրենց քաղաքացիներին չգնալ ՀՀ, պատգամավորը պատասխանեց, որ մեզ պես վտանգ են զգում. «Իրենք չեն ասել ՀՀ տարածք չգնաք, ասել են սահմանամերձ բնակավայրեր մի՛ գնացեք, դե, բնականաբար, լարվածությունը կա, այն տեսնում են, ինչպես մենք ենք ամեն վայրկյան անհանգստանում, որ գործողությունները կարող են այլ փուլ մտնել, նույն կերպ էլ Լեհաստանն ու ԱՄՆ-ն»,- պարզաբանեց Հովիկ Աղազարյանը:

Վերջինս ընդգծեց, որ ՀՀ իշխանությունները շատ թերացումներ ունեն, բայց այստեղ խնդիրը դա չէ. «Անկասկած, որոշակի թերացումներ ունի ներկայիս իշխանությունը, բայց խնդիրը դա չէ, այլ Ադրբեջանի տարածքներ գրավելու մոլուցքը: Այն, թե ներկայիս իշխանության սխալները ինչ հետևանք կարող են ունենալ այս իրավիճակում, դժվարանում եմ գնահատական տալ»,- նշեց նա: 

Անդրադառնալով Ռոբերտ Քոչարյանի այն հայտարարությանը, թե Նիկոլ Փաշինյանը չի կարողացել իր երկրի սահմանները պաշտպանել և դիմել է ՀԱՊԿ, պատգամավորը պատասխանեց. «Սահմանները պաշտպանելու խնդիր դրված չէր այստեղ, այլ դա միասնական մաքսային և սահմանային տարածք է, և որևէ երկրի սահմանի խախտման դեպքում համարվում է՝ խախտված է միասնական սահմանը. մենք պարտավոր էինք այդ քայլին գնալ, հակառակ դեպքում, ստիպված կլինեինք ռազմական ճանապարհով մեր խնդիրները լուծել»,- եզարափակեց Հովիկ Աղազարյանը: 

Զվարթ Պետրոսյան