Ձեզ համար ոչ մի արժեք չուներ, որ ձեր զինվորին ստորացրեցին. Սոֆյա Հովսեփյան

Գիտեմ, որ իմ հարցից հետո պետք է բազմերանգ ձայներ հնչեն, բայց պետք է հարցս տամ` ինչպե՞ս եք ձեզ զգում երեկվա տեսանյութից հետո: Այս մասին, այսօր՝ մայիսի 20-ին, ԱԺ արտահերթ նիստում իր ելույթում ասաց ԱԺ խպատգամավոր Սոֆյա Հովսեփյանը:

«Որեւէ կերպ ձեր արժանապատվությունը շարժվե՞ց, թասիբին կպա՞վ, թե ոչ: Որեւէ կերպ հասկացա՞ք ինչ է տեղի ունեցել, թե չէ: Ես գիտեմ, թե շատերդ հիմա ինչ եք զգում, բայց շատերի համար դա ոչ մի բան էր: Ձեր այստեղի ելույթներից ես վստահ եմ, որ ձեզ համար ոչ մի արժեք չուներ, որ ձեր զինվորին ստորացրեցին: Զինվորը ամբողջ ազգի հավաքական կերպարն էր եւ դա ամբողջ ազգի հանդեպ վերաբերմունք էր ձեր թողտվության հետեւանքով:

ԱԽ քարտուղարն ասում է՝ չենք հասցրել սահմանը կահավորել: 7 ամիսը քի՞չ է: Իսկ ինչու չեք հասցրել նվազագույն չափով կահավորել: Գլխավոր շտաբը եւ պաշտպանության նախարարը տեղյակ չէին այդ միջադեպից: Ինձ հետաքրքիր է, ընդհանրապես  թասիբ կա՞: Հետաքրքիր է ինչու են ԳՇ պետն ու նախարարը, ԱԽ քարտուղարը մինչեւ հիմա իրենց պաշտոններին»,-հայտարարեց պատգամավորը:

Նա համոզմունք հայտնեց, որ այս փաստաթուղթը հրապարակ է նետվել հենց իշխանության ներսից. «Տրվել է, որ աղմուկ բարձրացվի, թե տեսեք ինչ փաստաթուղթ է, հետո մեկ ուրիշը ներկայացվի, որ տեսեք՝ ստեցին: Ինձ գոնե չեք ստել, ես սպաում էի, որ այս խաղը պետք է խաղաք:

Վարչապետի այստեղից հնչած արտահայտություններում նա հստակ ցիտեց հետագա քայլերը, որոնք պետք է լինեն: Դեմարկացիայի հետեւանքով այն գյուղերը, որոնք Խորհրդային Ադրբեջանի գյուղեր են, որ գնաց 1991 թվականին կպավ... չէ այդպես չի: Երբ խոսում են Արծվաշենի մասին, շատ հուզական է, Արծվաշեն, Շահումյան, Գանձակ, բոլորը շատ հուզական է: Մի հատ Սեւ լճի սահման չեք հասցրել կահավորել, ի՞նչ երազանք ես պետք է ունենամ Արծվաշենի մասին, ի՞նչ երազանք պետք է ունենա այսօրվա սերունդը: Բայց չեմ կարող երազել, քանի դեռ մեր զինվորի արժանապատվությունը ոտնահարվում է»,-ասաց պատգամավորը:

Նա նկատեց, որ կարմիր գիծը վաղուց է հատվել. «Եկեք թույլ չտանք այս վտանգավոր փաստաթղթի ստորագրումը եւ պահանջենք, որ հետ կանգնեն իրենց կոչից: Պահանջում եմ նաեւ պատշաճ ձեւով զինել բանակը, տեր կանգնել զինվորին»: