ՔՊ-ական պաշտոնյաներից ովքե՞ր են «ջրից չոր» դուրս եկել. մաս 21

Այն բանից հետո, երբ քաղավիացիայի կոմիտեի ղեկավարի պաշտոնը ստանձնեց համեմատաբար անփորձ, սակայն հեղափոխական թիմը ներկայացնող Տաթևիկ Ռևազյանը, այս ոլորտում սկանդալներն անպակաս էին:

Ռևազյանի հաշվին կարելի է արձանագրել թերևս երկու խոշոր միջազգային սկանդալներ, որոնք, սակայն, չհանգեցրին վերջինիս հրաժարականին: Փետրվարի 22-ից մինչ օրս Իրանի տարածքում հայտնված ինքնաթիռը Հայաստան այդպես էլ չի վերադարձվել: Ավելին` պատկան մարմիններից այդպես էլ չի հաջողվում որեւէ պարզաբանում ստանալ՝ ինչու ինքնաթիռը մինչեւ օրս Հայաստան չի վերադարձվել:

Իսկ ինչ էր տեղի ունեցել. ըստ «Բոինգ B737-300» օդանավը 5 տարով վարձակալած «Ֆլայ Արմենիա էյրվեյզ» ավիաընկերության թռիչքային անձնակազմի և Իրանի ավիացիոն իշխանությունների հավաստիացման, Թեհրանի «Մեհրաբադ» միջազգային օդանավակայանում օդանավի վայրէջք կատարելու պատճառը եղել է տեխնիկական բնույթի, մասնավորապես՝ օդանավի վառելիքի հետ կապված խնդիրներ։

Եվ քանի դեռ Հայաստանում փորձում էին պարզել, անմասն չմնաց ԱՄՆ-ն եւ հորդորեց այս հարցին առնչվող բոլոր կողմերին անհապաղ հստակեցնել ինքնաթիռի գտնվելու վայրն ու կարգավիճակը` հիշեցնելով, որ Միացյալ Նահանգների օրենսդրությամբ արգելվում է ամերիկյան արտադրության ինքնաթիռների ու ավիացիոն պահեստամասերի փոխանցումը կամ այլ կերպ դրանց տրամադրումը Իրանին։ Նմանօրինակ գործողություններում ներգրավված կառույցները կարող են հայտնվել ԱՄՆ պատժամիջոցների տիրույթում:

Սովորաբար ԱՄՆ-ը պատժամիջոցներ կիրառում է կոնկրետ անձանց կամ կազմակերպությունների, բացառիկ դեպքերում՝ նաև պետությունների նկատմամբ։

Ավելի վաղ «Fly Armenia Airways» ավիաընկերությունը պարզաբանել էր, որ վարձակալած B737-300 օդանավի վրա ընթանում էին տեխնիկական աշխատանքներ Էստոնիայի մայրաքաղաք Տալլինում, ինչից հետո՝ փետրվարի 12-ից 22-ը ընկած ժամանակահատվածում, այն պետք է թռիչք կատարեր Ուկրաինայի «Հոստոմել» օդանավակայան՝ շարունակելու տեխնիկական սպասարկումը, սակայն փետրվարի 20-ին օդանավը թռել և անհայտ պատճառներով արտակարգ վայրէջք է կատարել Իրանում։ Քաղավիացիայի կոմիտեին պարզվեց` նույնիսկ տեղյակ չէ, թե ինչ է տեղի ունեցել, իսկ ինքը` Ռևազյանը, այդ պահին հանգիստն էր վայելում արտերկրում:

Ռևազյանի փայլուն աշխատանքի շնորհիվ էր նաև, որ Հայաստանը հայտնվեց ԵՄ սև ցուցակում: Նախորդ տարվա մայիսի 12-ին տեղի ունեցած Եվրոպական թռիչքային անվտանգության թիմի նիստում որոշում է կայացվել ՀՀ-ում գրանցված բոլոր օդանավ շահագործողներին ընդգրկել ԵՄ թռիչքային անվտանգության ցանկում, այլ կերպ ասած՝ Եվրամիության «սև ցուցակում»։ Որոշումը կայացվել է այդ տարվա փետրվարին կատարված ԵՄ գնահատման այցի դիտողությունների հիման վրա։ Ո՞վ պատժվեց Հայաստանի միջազգային վարկանիշի հետ նման կերպ խաղալու համար` ոչ ոք...