«Լուսավոր Հայաստան»-ը առաջարկում է փոխել ՀՀ սահմանադրությունը

«Լուսավոր Հայաստան» կուսակցության կառավարման խորհրդի անդամ, Ազգային ժողովի պատգամավոր Գևորգ Գորգիսյանը մայիսի 23-ին, կուսակցության 3-րդ համագումարի ժամանակ ներկայացրեց «Լուսավոր Հայաստանի»-ի ծրագիրը։ Գորգիսյանը նշեց, որ վերջին շրջանում քաղաքացիներին համոզում են, որ ընտրությունը պետք է լինի վատի և վատագույնի, հնի և գործողի, սևի և սպիտակի միջև։

««Լուսավոր Հայաստան»-ը այս արատավոր շղթան պետք է ջարդի ու մենք հայտարարում ենք, որ կա այլընտրանք ու այդ այլընտրանքը ձևավորելու համար մենք ապավինում ենք մեր քաղաքացիներին՝ նրանք կոչ անելով վերցնել իրենց վրա պատասխանատվությունը Հայաստանի ապագայի համար, գնալ ընտրատեղամաս և քվեարկել։ Եվ մենք կոչ ենք անում քվեարկել ոչ թե ընդդեմ ինչ-որ մարդկանց, ընդդեմ ինչ-որ գաղափարների, այլ քվեարկել հանուն»,- ընդգծեց Գորգիսյանը։

Նրա խոսքով՝ հանուն արդյունավետ կառավարման և ամուր պետականության «Լուսավոր Հայաստան»-ը առաջարկում է փոխել Սահմանադրությունը։

«Առաջարկում ենք ընդլայնել նախագահի և խորհրդարանի լիազորությունները, վերականգնել գյուղատնտեսության, սփյուռքի և մշակույթի նախարարությունները, բնականաբար, ավելի արդյունավետ կառուցվածքով»,- նշեց Գորգիսյանը։

Երևանում մայիսի 23-ին մեկնարկել է «Լուսավոր Հայաստան» կուսակցության 3-րդ համագումարը։ Համագումարի առաջին հատվածում ելույթներով են հանդես գալիս «Լուսավոր Հայաստան» կուսակցության կառավարման խորհրդի անդամները, Ազգային ժողովի «Լուսավոր Հայաստան» կուսակցության պատգամավորները։