«Հայաստան» դաշինքը ԿԸՀ ներկայացրեց իր ընտրական ցուցակը. ընդգրկված է 153 թեկնածու

«Հայաստան» դաշինքը ևս նախընտրական ցուցակները ներկայացրեց ԿԸՀ-ին: Լրագրողների հետ զրույցում Արամ Վարդևանյանն ասաց, որ ցուցակում ընդգրկված են 153 պատգամավորի թեկնածու. «Պատշաճ, արհեստավարժ, հայրենասեր մարդկանց թիմ է հավաքվել, որոնցով իսկապես կարելի է հպարտ լինել: Մրցունակության տեսանկյունից կարող եմ ասել, որ ստեղծված ճգնաժամային իրավիճակում կառավարչական անհրաժեշտ փորձ ու գիտելիքներ ունեցող թիմակիցներ ունենք»,- ասաց Արամ Վարդևանյանը:

Վերջինս նշեց, որ ԿԸՀ-ում «Հայաստան» դաշինքի պաշտոնական ներկայացուցիչները լինելու են ինքը, Վահագն Մատինյանը և Նարեկ Վարդանյանը. «Մենք այսօր եկել ենք արդեն ներկայացնենք ամբողջ ցուցակը: Շատ կարճ ժամանակ անց այն նաև հրապարակվելու է ԿԸՀ-ի կողմից, խնդրում եմ զինվեք համբերությամբ»,-նշեց նա: 

Լրագրողների այն հարցին, թե որ դաշինքի հետ երբեք չեն համագործակցի, նա պատասխանեց. ««Հայաստան» դաշինքը տարածել էր հայտարարություն, որ ներկայիս իշխանության և այդ ուժը ներկայացնող քաղաքական ուժի հետ բացառվում է որևէ տեսակի համագործակցությունը, որը ողջամիտ և տրամաբանական արձագանք է հաշվի առնելով, թե ինչ ենք տեսնում այս 3 տարիների ընթացքում և հատկապես նոյեմբերի 9-ից հետո, որը մինչև հիմա շարունակվում է»,- ասաց Արամ Վրադևանյանը:

Նա նաև հավելեց, որ ներկայիս իշխանության վարկանիշը ընկնում է, իսկ «Հայաստան» դաշինքինը կտրուկ աճում է. «Շեշտեմ, որ մենք դեռ չենք սկսել լիարժեք նախընտրական քարոզարշավը»,- ընդգծեց նա: