«Ազգային աղետ». Թուրքիայում անտառային հրդեհների հետևանքով զոհերի թիվն աճել է

Հինգշաբթի օրը Թուրքիայի հարավում տեղի ունեցած անտառային հրդեհների հետևանքով զոհերի թիվը հասել է 4-ի, ասել է գյուղատնտեսության և անտառային տնտեսության նախարար Բեքիր Պակդեմիրլին:

«Ցավոք, ևս մեկ մարդ մահացավ հրդեհների հետևանքով: Դա տեղի ունեցավ Մարմարիսի շրջանում»,-  ՏԱՍՍ-ի փոխանցմամբ` նրա խոսքը մեջբերել է TRT հեռուստաալիքը:

Ավելի վաղ Թուրքիայի հանրապետության նախագահի մամուլի խոսնակ Իբրահիմ Քալինը հայտարարել էր, որ անտառային հրդեհները Թուրքիայում ազգային աղետ են:

«Մեր բոլոր ստորաբաժանումները համակարգված եւ ինտենսիվ կերպով պայքար են մղում դրանց դեմ (անտառային հրդեհների՝ խմբ.): Դատախազությունը բազմակողմանի ուսումնասիրում է հրդեհների պատճառները: Աշխատանքը անխոնջ կերպով կշարունակվի»,- Twitter-ի իր էջում գրել էր նա:

Այժմ, ըստ Բեքիր Պակդեմիրլիի, քսան հրդեհների հետեւանքով յոթ նահանգ է տուժել՝ Ադանան, Անթալիա, Կայսերին, Քյութահյան, Մերսինը, Մուղլան, Օսմանիեն:

Մարմանը մասնակցում է երեք ինքնաթիռ, 38 ուղղաթիռ, 680 հրշեջ մեքենա եւ շուրջ չորս հազար մարդ: Վերջին երկու օրվա ընթացքում Թուրքիայի 17 նահանգներում տեղի է ունեցել ընդհանուր 58 անտառային հրդեհ, որոնցից 38-ը հաջողվել է վերահսկողության տակ վերցնել: Նախարարի խոսքով՝ վնասվել է վեց հազար հեկտար գյուղատնտեսական նշանակության հող եւ 500 հեկտար ջերմոց, հրդեհը ոչնչացրել է տասնյակ տներ:

Նախօրեին Անթալիայի նահանգի իշխանությունները հայտնել էին Մանավգաթի շրջանում ուժեղ անտառային հրդեհի մասին: Ուժեղ քամիների եւ տաք եղանակի պատճառով բոցն արագորեն տարածվել է մեծ տարածքի վրա: Հինգշաբթի տարերքը հսկողության տակ է առնվել: