Թալիբները Քաբուլի օդանավակայանն աշխատացնելու համար դիմել են Թուրքիային

 «Թալիբան» շարժման ներկայացուցիչները Քաբուլի օդանավակայանն աշխատացնելու հարցով տեխնիկական աջակցության համար դիմել են Թուրքիային՝ պայմանով, սակայն, որ թուրքական զինված ուժերը մյուս երկրների զինուժի նման մինչև օգոստոսի վերջ կլքեն Աֆղանստանի տարածքը: Այս մասին Reuters-ին հայտնել են երկու թուրք պաշտոնյա:

Լրատվական գործակալության զրուցակիցներից մեկը նշել է, որ այս առաջարկը դժվար ընտրության առաջ է դրել թուրքական կողմին: Թուրքիան, որպես ՆԱՏՕ-ի անդամ, Աֆղանստանում իրականացվող առաքելության շրջանակում դեռևս զինվորականներ ունի Քաբուլի օդանավակայանում, որոնք պատրաստ են առաջիկայում լքել այն: Սակայն Թուրքիայի նախագահ Ռեջեփ Թայիփ Էրդողանն ավելի վաղ հայտարարել էր, որ կարող է աֆղանական կողմի ցանկության պարագայում պահել ներկայությունն օդանավակայանում: Աֆղանստանում թալիբների կողմից վերահսկողություն հաստատելուց հետո Թուրքիան օդանավակայանում տեխնիկական ու անվտանգային աջակցություն ցուցաբերելու պատրաստակամություն էր հայտնել:

«Թալիբանը»-ը դիմել է Քաբուլի օդանավակայանն աշխատացնելու նպատակով տեխնիկական օգնություն տրամադրելու հարցով»,- հայտնել է բարձրաստիճան թուրք պաշտոնյան՝ նշելով, սակայն, որ թուրքական զորքերի դուրսբերումը բարդացնում է նման առաքելության հնարավորությունը՝ հաշվի առնելով անվտանգային ռիսկերը:

Բարձրաստիճան մյուս պաշտոնյան Reuters-ին հայտնել է, որ մինչև օգոստոսի 31-ը թուրքական կողմը որոշում կկայացնի: