Շվեդիայի գերագույն դատարանը մերժել է Թուրքիայի խնդրանքով տղամարդու արտահանձնումը

Շվեդիայի գերագույն դատարանը մերժել է Թուրքիայի խնդրանքով տղամարդու արտահանձնումը՝ ասելով, որ հանցագործությունը, որը, ինչպես նշվում է, կատարել է այդ տղամարդը, «քրեականացված չէ» սկանդինավյան երկրում, հայտնում է AP-ն։

Գերագույն դատարանի հայտարարության մեջ ասվում է, որ «արտահանձնման խոչընդոտներ կան, քանի որ խոսքն, այսպես կոչված, քաղաքական հանցագործությունների, այսինքն՝ պետության դեմ ուղղված եւ քաղաքական բնույթ կրող հանցագործությունների մասին է»: Դատարանը չի նշել կասկածյալի անունը՝ համաձայն Շվեդիայի քաղաքականության:

Սակայն շվեդական TT լրատվական գործակալությունը հայտնել է, որ խոսքը Բյուլենտ Քենեսի մասին է, որը Անկարայի պնդմամբ պատասխանատու է 2016 թվականին Թուրքիայում հեղաշրջման փորձի համար։

55-ամյա Քենեսը, որն ապաստան է ստացել Շվեդիայում, եղել է անգլիալեզու Today's Zaman թերթի խմբագիրը, որին կապում են իսլամական քարոզիչ Ֆեթուլլահ Գյուլենի շարժման հետ։ Այն փակվել է Գյուլենի շարժման դեմ իշխանությունների կողմից իրականացվող ճնշումների շրջանակներում։ Թուրքիան Գյուլենին մեղադրում է 2016 թվականի ձախողված հեղաշրջման մեջ եւ նրա ցանցը համարում է «ահաբեկչական կազմակերպություն»։

Թուրքիան ձգձգում է ՆԱՏՕ-ին անդամակցելու Շվեդիայի եւ Ֆինլանդիայի հայտերի վավերացումը՝ ճնշում գործադրելով սկանդինավյան երկու երկրների վրա, որպեսզի վերջիններս արտահանձնեն այն մարդկանց, ում Անկարան համարում է «ահաբեկիչներ»:

Անցյալ ամիս Էրդողանը Քենեսի մասին հիշատակել էր Անկարայում Շվեդիայի վարչապետի հետ համատեղ ասուլիսի ժամանակ։ «Շվեդիայում կա ահաբեկչական կազմակերպության (Գյուլենի) մեկ անդամ, որի անունը ես կնշեմ՝ Բյուլենտ Քենես,- ասել էր Էրդողանը,- «Օրինակ, այս ահաբեկչի արտաքսումը Թուրքիա մեզ համար մեծ նշանակություն ունի, եւ մենք, անշուշտ, ցանկանում ենք, որ Շվեդիան ավելի նրբանկատ գործի այս հարցում:

Քենեսը ողջունել է որոշումը, սակայն պնդել է, որ իրեն նույնիսկ կասկածյալ չի կարելի համարել։

«Իհարկե, ես երջանիկ եմ: Բայց որոշումը սպասելի էր»,- ասել է Քենեսը շվեդական SVT հեռուստաալիքին: «Ես լիովին գոհ չեմ, քանի որ ասում են, որ ինձ կասկածում են Թուրքիայում հանցագործությունների մեջ։ Ես ընդհանրապես ոչ մի հանցանք չեմ գործել։ Այս մեղադրանքներն ամբողջությամբ հորինված են Էրդողանի ռեժիմի կողմից»։

Ստոկհոլմի գերագույն դատարանը հայտարարել է, որ գոյություն ունի «հալածանքի վտանգ՝ հիմնված անձի քաղաքական հայացքների վրա»։ «Այս գործում ակնհայտորեն կան արտահանձնման մի քանի խոչընդոտներ»,- ասվում է Գերագույն դատարանի դատավոր Պետեր Ասպի հայտարարության մեջ,- Ուստի արտահանձնում չի կարող տեղի ունենալ»։

Այս ամսվա սկզբին Շվեդիան արտաքսել է մի անանուն տղամարդու, որը փախել է այնտեղայն բանից հետո, երբ թուրքական դատարանը նրան մեղավոր է ճանաչել 2015 թվականին զինված կազմակերպությանն անդամակցելու համար։