10-ամյա տղան զանգահարել է փրկարար ծառայություն և խնդրել՝ օգնեն իրեն կատարել տնային առաջադրանքը

ԱՄՆ Վիսկոնսին նահանգից տասնամյա տղան չի կարողացել գլուխ հանել տնային առաջադրանքներից և զանգահարել է 911։ Այս մասին գրում է ABC News-ը։

Կապ հաստատելով գործակարգավար Քիմ Քրաուզեի հետ՝ տղան ասել է, որ իր ընտանիքում ոչ ոք «մաթեմատիկայից ուժեղ չէ» և օգնություն է խնդրել: Քրաուզեն լսել է խնդիրը և հասկացել, որ չի կարողանա արագ լուծել այն։ Այդ ժամանակ էլ որոշել է ոստիկան ուղարկել՝ երեխային օգնելու համար։

Զանգին արձագանքած ոստիկանը՝ տեղի շերիֆի տեղակալ Չեյզ Մեյսոնը, խոստովանել է, որ ինքը նույնպես «մաթեմատիկայից այնքան էլ լավ չէ», բայց, այնուամենայնիվ, համաձայնել է օգնել երեխային։ Միասին, բարեբախտաբար, նրանք կարողացել են լուծել խնդիրը։

Դրանից հետո Մեյսոնը տղային այցեքարտ է տվել և խնդրել է զանգահարել, եթե օգնության կարիք ունենա։ Սակայն, հավելել է ոստիկանը, հաջորդ անգամ ավելի լավ է, որ երեխան օգտվի «ոչ շտապ օգնության» գիծից, եթե իրավիճակը չի սպառնում իր կյանքին։