ԴԻԱԼՈԳ կազմակերպության աջակցությամբ Հայաստանի և Բաշկորտոստանի միջև ընդլայնվում է գիտա-կրթական համագործակցությունը

Տևական ժամանակի ընթացքում ԴԻԱԼՈԳ կազմակերպությունը հայ-ռուսական միջտարածաշրջանային փոխգործակցության շրջանակներում գիտա-կրթական համագործակցություն է հաստատում Բաշկորտոստանի հետ՝ հիմքեր ստեղծելով Հայաստանի և Բաշկորտոստանի գիտական, կրթական հաստատությունների և ստեղծագործական միությունների միջև համակարգային գործընկերության համար (օրինակը՝ հղումով․  Сотрудничество организации ДИАЛОГ с Республикой Башкортостан).

 

Այս աշխատանքների կարևոր բաղադրիչ է հանդիսանում ԴԻԱԼՈԳ կազմակերպության նախագահ Յուրի Նավոյանի և բաշկիր գիտնական, գրող, քանդակագործ և ռուսաստանյան պետական գործիչ Ռաֆայիլ Զինուրովի երկարամյա հետազոտական, ստեղծագործական և հասարակական-քաղաքական բնույթի համագործակցությունը։  

 

Այս գործունեության շրջանակում հուլիսի 25-27-ը  Յուրի Նավոյանը և Հայաստանի ԳԱԱ Պատմության ինստիտուտի տնօրեն, ակադեմիկոս Աշոտ Մելքոնյանը այցելել են Ուֆա։ Հայաստանի և Բաշկորտոստանի միջև գիտա-կրթական հետագա համագործակցության կոնկրետ ծրագրերը նրանք քննարկել են Ռուսաստանի ԳԱ Ուֆայի դաշնային հետազոտական կենտրոնի ղեկավար Վասիլի Մարտինենկոյի և կենտրոնի կազմի մեջ մտնող մի շարք ինստիտուտների տնօրենների, Բաշկորտոստանում Ռուսաստանի ԳԱ ներկայացուցչության ղեկավար Ռաֆայիլ Զինուրովի հետ։ Հյուրերը նաև այցելել են  Ռուսաստանի ԳԱ Ուֆայի դաշնային հետազոտական կենտրոնի Ռ․ Կուզեևի ավան Էթնոլոգիական հետազոտությունների ինստիտուտի հնագիտության և ազգագրության թանգարան։  

 

Հայ հյուրերի՝ Ուֆա այցի շրջանակում հուլիսի 26-ին համաձայնագիր է ստորագրվել Ռուսաստանի ԳԱ Ուֆայի դաշնային հետազոտական կենտրոնի Ռ․ Կուզեևի ավան Էթնոլոգիական հետազոտությունների ինստիտուտի, Հայաստանի ԳԱԱ Պատմության ինստիտուտի և Բաշկորտոստանում Ռուսաստանի ԳԱ ներկայացուցչության միջև։ Համաձայնագիրը ստորագրել են Ռուսաստանի ԳԱ Ուֆայի դաշնային հետազոտական կենտրոնի Ռ․ Կուզեևի ավան Էթնոլոգիական հետազոտությունների ինստիտուտի տնօրեն Սերգեյ Եմելինը, Հայաստանի ԳԱԱ Պատմության ինստիտուտի տնօրեն Աշոտ Մելքոնյանը և Բաշկորտոստանում Ռուսաստանի ԳԱ ներկայացուցչության ղեկավար Ռաֆայիլ Զինուրովը։ Այն նախատեսում է համատեղ պատմա-էթնոլոգիական հետազոտությունների իրականացում, գիտաժողովների անցկացում, ժողովածուների հրատարակում, գիտական գրականության փոխանակում և այլն։ 

 

Կողմերի միջև համաձայնագրի ստորագրումը ողջունել են Ռուսաստանի ԳԱ Ուֆայի դաշնային հետազոտական կենտրոնի ղեկավար Վասիլի Մարտինենկոն և ԴԻԱԼՈԳ կազմակերպության նախագահ Յուրի Նավոյանը։ 

Մասնավորապես, նա, շնորհավորելով կողմերին Հայաստանի և Բաշկորտոստանի միջև գիտական համագործակցությունը ամրագրող այս կարևոր քայլի կապակցությամբ, նշել է, որ իրենց ներկա այցը Ուֆա և համաձայնագրի ստորագրումը տեղի են ունենում հունիսին Երևանում հաջողությամբ կայացած Հայ-Ռուսական առաջին գիտա-կրթական ֆորումից անմիջապես հետո։