«Չորրորդ ինքնիշխանություն». Սերժ Սարգսյանը «թոզ է փչում» կամ էլ անկապ ժողովների անցկացման մեծ սիրահար է

Թերթը գրում է. «Այս տարվա ամենաաղմկահարույց դատական գործը, թերեւս, կապված էր ՀՀԿ-ական Հովհաննես Շահինյանի եւ բարձրաստիճան ոստիկան Հովհաննես Թամամյանի անունների հետ: «ՉԻ»-ն ամբողջ տարի մանրամասն եւ հետեւողականորեն լուսաբանել է դատական այս գործը: Հիշեցնենք. խոսքը 2010 թվականի մայիսի 12-ին Երեւանի Կոմիտասի պողոտայում Խաչիկ Մկրտչյանին սպանելու կապակցությամբ հարուցված քրեական գործի մասին է, որի շրջանակներում սպանության մեղադրանք էր առաջադրվել Հովհաննես Շահինյանի քրոջ որդուն՝ Արսեն Ահարոնյանին, իսկ այնուհետեւ այդ հանցանքում մեղադրվեց Վռամ Բաղդասարյանը: Տարին մոտենում է ավարտին, եւ ՀՀ վերաքննիչ դատարանը որոշել է հասցնել դեկտեմբերի 29-ին լսել 14 տարվա ազատազրկման դատապարտված Վռամ Բաղսդասարյանի Վերաքննիչ բողոքը: «Սա հերթական ապօրինությունն է»,– երեկ հայտարարել է Հելսինկյան ասոցիացիան: Բանն այն է, որ Վռամը 14 տարվա ազատազրկման դատապարտվեց այս տարվա նոյեմբերի 11-ին: Վերջինիս պաշտպանները այս տարվա դեկտեմբերի 9-ին վերաքննիչ բողոք են ներկայացրել՝ գործին կցելով նոր ապացույցներ եւ միջնորդելով վերաքննության կարգով քննել քրեական գործը:

ՀՀ վերաքննիչ դատարանը քրեական գործի նյութերը, որը բաղկացած է 15 հատորից, ստացել է դեկտեմբերի 16-ին, եւ դատը նշանակել է դեկտեմբերի 29-ին՝ ժամը 13:00-ին՝ զրկելով պաշտպանական կողմին ներկայացնելու նոր ապացույցներ եւ պատշաճ պաշտպանություն իրականացնելու: ՀՀ քրեական դատավարության օրենսգրքի 388 հոդվածը սահմանում է վերաքննիչ դատարանում վերաքննիչ բողոքի հիման վրա ստացված գործերի քննության ժամկետը, որը վերաքննիչ դատարանն սկսում է քրեական գործը կամ նյութը ստանալու օրվանից հետո՝ 15 օրվա ընթացքում, սակայն հարգելի պատճառների առկայության դեպքում գործը քննող դատարանի որոշմամբ այդ ժամկետը կարող է երկարաձգվել, բայց ոչ ավելի, քան 10 օրով: Ընդ որում՝ գործի քննության ողջամիտ ժամկետը որոշելիս հաշվի է առնվում նաեւ առաջին ատյանի դատարանում գործի քննության ժամկետը:

Նշված քրեական գործը բաղկացած էր 9 հատորից, 10 ամիս առաջին ատյանի դատարանը քննել է այն, որի արդյունքում' ՀՀ վերաքննիչ դատարան գործն ուղարկելիս այն արդեն բաղկացած է եղել 15 հատորից: «Ըստ էության վերաքննիչ դատարանը դատական նիստը նշանակել է 15-օրյա ժամկետը պահպանելով, բայց միթե ֆիզիկապես հնարավոր էր 13 օրում՝ 4 օրը ոչ աշխատանքային օրեր են, ծանոթանալ 15 հատորից բաղկացած քրեական գործի նյութերին, լսել շուրջ տասը ամսվա դատաքննության դատական նիստերի ձայնագրությունները, ընդ որում՝ ՀՀ քրեական դատավարության օրենսգրքի 389 հոդվածի՝ բացի նախագահող դատավորից գործի նյութերն ուսումնասիրում են նաեւ դատարանի կազմի մյուս դատավորները: Փաստ է, որ թե նախագահող դատավոր Գ. Ավետիսյանը, թե դատարանի կազմի մեջ մտնող դատավորներ՝ Ե. Դարբինյանը եւ Ս. Չիչոյանը չեն ծանոթացել քրեական գործի նյութերին», տեղեկացնում են Հելսինկյան ասոցիացիայից:

Ավելացնենք նաեւ, որ մի քանի օր առաջ, ավելի որոշակի՝ դեկտեմբերի 13-ին, Հելսինկյան ասոցիացիան Վռամ Բաղդասարյանի քրեական գործով տեղի ունեցած ապօրինությունների մասին բողոք էր ներկայացրել Սերժ Սարգսյանին՝ պահանջելով՝ որպես ՀՀ-ում օրինականության երաշխավոր հետամուտ լինել սույն քրեական գործով արդար դատաքննությանը: Նամակի հանձնումից մի քանի օր հետո՝ դեկտեմբերի 22-ին, ինչպես հիշում եք, Սերժ Սարգսյանը խորհրդակցություն էր հրավիրել դատաիրավական համակարգի խնդիրների վերաբերյալ՝ ընդգծելով քրեական արդարադատության բնագավառում շատ հաճախակի հանդիպող ուղղակի ապօրինի որոշումների մասին, ինչպես նաեւ կարեւորել էր այդ որոշումների վերանայումը՝ վերականգնելով անձանց խախտված իրավունքները: «Սակայն ինչպես ցույց տվեց սույն քրեական գործով ՀՀ վերաքննիչ դատարանի կողմից դատաքննության հապճեպ նշանակումը, այն էլ վճռաբեկության կարգով, միանշանակ հիմնավորվում է, որ պետության նախագահի հրահանգները ուղղակիորեն բանի տեղ չեն դրվում կամ էլ ժամանակ առ ժամանակ նախագահը թոզ փչելու համար նմանատիպ ժողովներ է անցկացնում»,– երեկ հայտարարել է Հելսինկյան ասոցիացիայի նախագահ Միքայել Դանիելյանը: