Շտաբային ուսումնավարժություն ՆԳՆ Փրկարար ծառայությունում

Նոյեմբերի 23-ին ՆԳՆ փրկարար ծառայությունում անցկացվել է «Ճգնաժամային կառավարման ազգային կենտրոնի անձնակազմի գործողությունները Երևան քաղաքի «Մեգա Մոլ» առևտրի կենտրոնում հրդեհի և պայթյունի դեպքում» թեմայով շտաբային ուսումնավարժություն, որը գլխավորում էր ՆԳՆ Փրկարար ծառայության տնօրենի տեղակալ, փ/ծ գնդապետ Ե.Կարապետյանը։

 

Ուսումնավարժությանը մասնակցում էին ՆԳՆ ՓԾ ճգնաժամային կառավարման ազգային կենտրոնի, Փրկարարական ուժերի, Երևան քաղաքի փրկարարական վարչությունների, ՆԳՆ ոստիկանության, Շտապ բժշկական օգնության, Նոր Նորք վարչական շրջանի ներկայացուցիչներ, ինչպես նաև «Մեգա Մոլ» առևտրի կենտրոնի անվտանգության պատասխանատու աշխատակիցներ։

 

Վարժանքն իրականացվել է երեք փուլով։ Խաղարկվել են մասնակիցների ազդարարման և հավաքի, տվյալների հավաքագրման, իրավիճակի գնահատման և խնդրադրման գործողությունները, իրականացվել են տեղեկատվության համակարգում, քարտեզագրում, ստորաբաժանումների արձագանքման կազմակերպում և գործողությունների համակարգում, ԵՏՀ կիրառմամբ հնարավոր իրավիճակի մոդելավորում և հետագա զարգացման կանխատեսում, ուժերի միջև փոխգործողությունների կազմակերպում և աշխատանքների համակողմանի ապահովում:

 

Ըստ սցենարի՝ տեղեկատվական հոսքերի արդյունավետ կազմակերպման նպատակով ստեղծվել է 4 խումբ.

• Երկրատեղեկատվական համակարգերի կիրառման

• Զոհերի, տուժածների և հոսպիտալացվածների հաշվառման

• «Թեժ գծի» գործունեության ապահովման և ՆԳՆ ՓԾ համապատասխան սոցիալական կայքերի պաշտոնական էջերում տեղեկատվության համակարգման

• Շահագրգիռ գերատեսչությունների և կազմակերպությունների հետ փոխհամագործակցության ուղղությամբ:

Վարժանքի նպատակն էր.

 

ամրապնդել ՆԳՆ ՓԾ ճգնաժամային կառավարման ազգային կենտրոնում ներգրավված անձնակազմի գիտելիքներն արտակարգ իրավիճակների առաջացման դեպքում,

կատարելագործել ՃԿԱԿ անձնակազմի կարողություններն ու հմտությունները՝ առևտրի կենտրոնում պայթյունի դեպքում հնարավոր իրավիճակի բացահայտման և գործողությունների ծավալման ուղղությամբ՝ ՃԿԱԿ ծրագրային փաթեթների, համակարգերի կիրառման, առկա շտեմարանների օգտագործման, քարտեզների ստացման և դրանցում տեղեկատվության արտացոլման միջոցով:

 

Վարժանքի ընթացքում մասնակիցների ակտիվ հարց ու պատասխանի արդյունքում պարզաբանվել են բազմաթիվ հարցեր, մատնանշվել են վարժանքի թույլ և ուժեղ կողմերը, ինչպես նաև ներկայացվել առաջարկություններ:

 

Ամփոփելով ուսումնավարժության արդյունքները՝ Ծառայության տնօրենի տեղակալը շնորհակալություն է հայտնել մասնակիցներին և կարևորել նմանատիպ համատեղ ուսումնավարժությունների շարունակական և արդյունավետ լինելը, հատկապես գործընկեր կառույցների հետ փոխհամագործակցությունը: