Եղել է հրմշտոց ու վիճաբանություն․ Գնել Սանոսյանը՝ Երևանի ՋԷԿ-ում տեղի ունեցածի մասին

 Ոչ թե ծեծկռտուք է եղել, այլ վիճաբանություն ու հրմշտոց, ընդ որում՝ «Երևանի ՋԷԿ»-ի հետ առնչություն չունեցող հարցի շուրջ։ Այսօր Ազգային ժողովում այս հայտարարությունն արեց ՀՀ տարածքային կառավարման և ենթակառուցվածքների նախարար Գնել Սանոսյանը՝ անդրադառնալով երեկվա միջադեպին։

 

Նոյեմբերի 14-ին MediaHub.am–ը հայտնեց, որ «Երևանի ՋԷԿ» ՓԲԸ–ի տարածքում առավոտյան վիճաբանություն է տեղի ունեցել, և ՊՊԾ նախկին պետ, ՋԷԿ–ի փոխտնօրեն Սարգիս Հովհաննիսյանի և անվտանգության պետ Արթուր Պահլավունու միջև ծեծկռտուք է սկսվել։ Սարգիս Հովհաննիսյանը ԱԱԾ գեներալ-մայոր է, մինչ «Երևանի ՋԷԿ» ՓԲԸ փոխտնօրեն նշանակվելը եղել է Պետական պահպանության ծառայության պետ, 2023 թվականի սեպտեմբերի 9-ին պաշտոնից ազատվել է «Դվին» հյուրանոցի տանիքում հնչած հրավառության պատճառով։ Իսկ Արթուր Պահլավունին էլ Երևանի քաղաքապետ Տիգրան Ավինյանի կնոջ հայրն է։ Սանոսյանի խոսքով՝ դեպքը տեղի է ունեցել վաղ առավոտյան, երբ դեռ աշխատանքային ժամը սկսված էլ չի եղել։

Նրա խոսքով՝ այս պահին որոշակի իրավական գործընթաց է կատարվում, որն առավել մանրամասն պատասխաններ կտա հարցերին։