Ցածր թոշակների պայմաններում պետական օղակի աշխատավարձը 3–4 անգամ բարձրացնելը չի ընկալվելու․ Փաշինյան

Պետական աշխատանքը պետք է սոցիալական որոշակի պայմաններ ապահովի:«Արմենպրես»-ի հաղորդմամբ՝ այս մասին ասաց Հայաստանի վարչապետ Նիկոլ Փաշինյանը Հակակոռուպցիոն կոմիտեում

Անդրադառնալով կոռուպցիային՝ Փաշինյանն ասաց. «Պետք է մի բան արձանագրել, որը դուր չի գալիս մեր հանրությանը. Պաշտոնյան, որը կառավարում է մի քանի միլիարդ դրամ՝ ստանալով 150 հազար դրամ աշխատավարձ, արդեն կոռուպցիայի շատ նպաստավոր պայման է: Սա էլ է պետք հաշվի առնել»:

Նա նկատեց՝ շատ են ասում, որ 2018–ի հեղափոխությունից հետո առօրյա կոռուպցիան դադարել է, հետո սկսել է կամաց–կամաց գալ:

«Դա կարող է ունենալ հետևյալ մեկնաբանությունը, որ այդ միլիարդներ կամ միլիոններ կառավարող պաշտոնյաների շերտի մոտ սկզբում ակնկալիք ձևավորեց, որ կլինի այդ թվում աշխատավարձերի փոփոխություն, հետո տեսան, որ դա պոպուլյար չէ: Ինչքան էլ մենք 2018–ից մինչև օրս շուրջ 30 տոկոս տնտեսական աճ ենք ապահովել, բայց, միևնույն է, սոցիալական խնդիրը շատ սուր է դրված: Այսօր այն պայմաններում, երբ թոշակներն այդքան ցածր են, մարդկանց ասել, որ նախարարության կամ պետական օղակի աշխատավարձը 3–4 անգամ բարձրացնում ենք, չի ընկալվելու»,–ասաց Փաշինյանը:

Վարչապետը հավելեց՝ որքան էլ հասկանում է այդ խնդիրը, սակայն դժվար է նման որոշում կայացնել: «Թոշակառու տատիկների–պապիկների աչքերին ոնց ես նայելու, ոնց ես բացատրելու»,–նշեց նա՝ հավելելով՝ հասկանում է, որ այդ հարցում էլ պետք է որոշում կայացնել:

Նա շեշտեց՝ պետական աշխատանքը պետք է մարդու սոցիալական որոշակի պայմաններ ապահովի: Վարչապետն ընդգծեց, որ Հակակոռուպցիոն կոմիտեի, Քննչական կոմիտեի, Դատախազության դեպքում էլ այդ որոշումը կայացրել են հենց այն տրամաբանությամբ, որ մարդկանց համար ինչ-որ մինիմալ իրավիճակ, բարոյական հարթություն ստեղծեն, որ հնարավոր լինի ոլորտում առաջընթաց ապահովել:

«Այս խնդիրը մենք ունենք: Հիմա, երբ քննարկում ենք, թե ամենօրյա կոռուպցիան ինչու է այդպիսի երևույթներ տալիս, դրա պատճառը դա է: Մարդիկ կամ պետք է չաշխատեն այդտեղ, կամ աշխատելիս ամեն օր գայթակղությունները հաղթահարեն»,–նշեց վարչապետը: