Մոսկվան ռուսերեն լեզվի քննություն է պահանջում ներգաղթյալների համար

Ռուսաստանում դեկտեմբերի 1-ից ուժի մեջ է մտնում նոր օրենք, որը պարտադրում է աշխատանքի համար ՌԴ ներգաղթածներին ռուսերեն լեզվի քննություն հանձնել. հաղորդում է BBC-ն:

Ռուսերենի իմացության հաստատումն անհրաժեշտ է ինչպես աշխատանք ստանալու, այնպես էլ այդ աշխատանքային պայմանագիրը երկարաձգելու թույլտվություն ստանալու պահին: Այն պետությունների քաղաքացիները, որոնցում ռուսերենը պետական լեզու է համարվում, քննություն չեն հանձնելու:

Ռուսաստանի Դաշնային միգրացիոն ծառայության տվյալներով՝ տարեկան Ռուսաստան է ներգաղթում 13 մլն գասթարբայթեր, որոնց մեծամասնությունը չի տիրապետում ռուսերենին: Դրանք հիմնականում նախկին ԽՍՀՄ երկրների քաղաքացիներ են:

Ռուսաստան գալու նրանց հիմնական նպատակը գումար վաստակելն է՝ հայրենիքում իրենց ընտանինքերի գոյությունն ապահովելու համար:

Օրինակ՝ Տաջիկստանի միգրացիոն ծառայություն տվյալներով՝ այս տարի Ռուսաստան արտագնա աշխատանքի է մեկնել 600 հազար մարդ, որոնց կեսից ավելի ռուսերենին բացարձակ չի տիրապետում:

Մասնագետների կարծիքով՝ լեզվական պատնեշը միգրանտների հիմնական խնդիրն է աշխատանքային ոլորտում: