Ավստրալիայում տղամարդը գտել է հնագույն երկնաքարի կտոր

2015 թվականին Ավստրալիայի բնակիչ Դեյվիդ Հոլը Մելբուրնի մերձակայքում գտնվող Մերիսբորո շրջանում մետաղի որոնման ժամանակ «ոսկու բնակտոր» է հայտնաբերել: Պարզվել է, որ «ոսկին» հազվագյուտ երկնաքար է՝ 4,6 միլիարդ տարեկան։ Գիտնականներն իրենց ուսումնասիրության արդյունքները ներկայացրել են «Proceedings of the Royal Society of Victoria» (PRSV) ամսագրում:

Երկնաքարերը բնական «ժամանակի մեքենաներ» են, որոնք մեզ կարող են պատմել արեգակնային համակարգի վաղ պատմության մասին, ներառյալ՝ մոլորակների ձևավորումը, ինչպես նաև օգնել ուսումնասիրել դրա տարիքը, կառուցվածքը և էվոլյուցիան: Որոշ երկնաքարեր պարունակում են տարրեր, որոնք նախորդել են մեր համակարգի ձևավորմանը, ինչպես նաև օրգանական մոլեկուլներ, որոնք կարող են ընկած լինել կյանքի առաջացման հիմքում:

Երկնաքարը, որը ստացել է Մերիսբորո անվանումն՝ հայտնաբերման վայրի պատվին, կշռում է 17 կիլոգրամ:

«Եթե գտնեիք նման քար, շատ կզարմանաիք դրա քաշից», - ասել է Մելբուրնի թանգարանի երկրաբան Դերմոտ Հենրին:

Հետազոտողները պարզել են, որ այն հիմնականում բաղկացած է երկաթից և պատկանում է սովորական քոնդրիտների տեսակին։ Մերիսբորոն Վիկտորիա նահանգում գրանցված միայն 17-րդ երկնաքարն է և մեծությամբ երկրորդը տարածաշրջանում:

Ըստ գիտնականների՝ քարն, ամենայն հավանականությամբ, առաջացել է Մարսի և Յուպիտերի միջև գտնվող աստերոիդների գոտում: Ռադիոածխածնային թվագրումը ցույց է տվել, որ այն կարող էր վայրէջք կատարել Երկրի վրա 100-ից հազար տարի առաջ:

Հետազոտողները գտածոն ոսկուց ավելի արժեքավոր են համարում գիտական ​​նշանակության ու հազվադեպության պատճառով։