Գիտնականները պարզել են՝ ինչպես է քաշի ավելացումը ազդում երջանկության մակարդակի վրա

Գերմանացի գիտնականները պարզել են, որ քաշի ավելացումը, հակառակ տարածված կարծիքի, էական բացասական ազդեցություն չի ունենում երջանկության մակարդակի վրա։ Իրականում, երբեմն քաշի ավելացումը կարող է նույնիսկ կապված լինել երջանկության մակարդակի մի փոքր աճի հետ: Այս ազդեցությունը նկատվում է մարդկանց մոտ՝ անկախ սեռից և տարիքից։ Աշխատանքը հրապարակվել է International Journal of Applied Positive Psychology ամսագրում:

Հետազոտությանը մասնակցել է 25-60 տարեկան 8815 մարդ: Դիտարկումներն իրականացվել են տասը տարվա ընթացքում՝ 2011-2021 թվականներին։ Երջանկության մակարդակը գնահատվել է 0-10 բալանոց սանդղակով, իսկ մարմնի զանգվածի ինդեքսը, որը հաշվարկվում է՝ որպես մարդու քաշի և հասակի հարաբերակցություն, որոշվել է ինքնազեկուցված տվյալների հիման վրա:

Պարզվել է, որ զանգվածի ինդեքսի (BMI) փոփոխության հետ մեկտեղ՝ երջանկության մակարդակը մնացել է անփոփոխ կամ նույնիսկ աճել է:

Տղամարդկանց մոտ, BMI-ի 22-ից 30-ի աճով, երջանկության փոքր, բայց վիճակագրորեն նշանակալի աճ է գրանցվել, մինչդեռ կանանց մոտ կյանքի բավարարվածության մակարդակը կայունացել է 27 BMI-ի վրա և չի նվազել հետագա քաշի ավելացման հետ:

Հետազոտության հեղինակ Ֆելիքս Բիթմանը` Լայբնիցի կրթական հետագծերի ինստիտուտից, ենթադրում է, որ քաշի ավելացման հոգեբանական ազդեցությունը կարող է նվազագույն լինել, քանի որ մարդիկ հարմարվում են նոր պայմաններին: Հնարավոր է նաև, որ մարմնի դրական վերաբերմունքի ժամանակակից շարժումներն օգնում են նվազեցնել հասարակության մեջ քաշի մասին բացասական ընկալումները:

«Գտնել, որ քաշի ավելացումը ոչ մի ազդեցություն չի ունեցել երջանկության վրա, անսպասելի էր», - ասել է Բիթմանը: «Սակայն դա բացատրում է, թե ինչու շատ մարդիկ չեն ձգտում նիհարել. քաշ հավաքելը նրանց համար հոգեբանական անհանգստություն չի առաջացնում»: