Ալիեւի օգնականը դժգոհել է Հայաստանի հետ հարաբերությունների մասին Թաքեր Կառլսոնի «անբավարար դրական նյութից»

Ադրբեջանի նախագահի օգնական – նախագահի աշխատակազմի արտաքին քաղաքականության հարցերի գծով բաժնի վարիչ Հիքմեթ Հաջիեւը Դոհայի միջազգային համաժողովում հայտնել է, որ ամերիկացի լրագրող Թաքեր Կառլսոնի «վերջին նյութը» հայ-ադրբեջանական հարաբերությունների մասին «բավականաչափ դրական չէր խաղաղությանն աջակցելու համար», տեղեկացրել են ադրբեջանական լրատվամիջոցները։

«Նա համաձայնել է ինձ հետ։ Ես անգամ առաջարկեցի, որ հաջորդ անգամ նա հրավիրի Հայաստանի եւ Ադրբեջանի ներկայացուցիչներին միասին, եւ մենք իսկապես կխոսենք խաղաղության իրական օրակարգի մասին։ Սա պարզապես օրինակ է։ Որովհետեւ միջազգային լրատվամիջոցները եւ միջազգային հանրությունը պետք է մեզ աջակցեն։ Մենք շարժվում ենք դեպի ապագա եւ ցանկանում ենք մեր ապագա սերունդներին պաշտպանել պատերազմի վերքերից»,- ասել է Հաջիեւը։

Բաքվի ներկայացուցիչն, ըստ երեւույթին, նկատի ունի Կառլսոնի հարցազրույցը  «Մեր ձեւով» ժողովրդական շարժման համակարգող Նարեկ Կարապետյանի հետ։

Հարցազրույցի ընթացքում Նարեկ Կարապետյանն  անդրադարձել է տարբեր թեմաների՝ Հայոց ցեղասպանությունից եւ Լեռնային Ղարաբաղում հայկական քրիստոնեական ժառանգության պաշտպանության համար պայքարից մինչեւ իրավիճակը Հայ Առաքելական եկեղեցու շուրջ։