Գտնվել է կապ սրտի արատների և քաղցկեղի միջև

Սունգկյունկվան համալսարանի (Հարավային Կորեա) գիտնականները պարզել են, որ սրտի բնածին արատներով երեխաների և նրանց մայրերի մոտ քաղցկեղի զարգացման ռիսկը զգալիորեն մեծանում է: Հետազոտության արդյունքները հրապարակվել են Circulation ամսագրում։

Միացյալ Նահանգներում սրտի բնածին արատները (ՍԲՀ) ամենասովորական բնածին արատներից են: Դրանք կարող են տատանվել ավելի քիչ լուրջ անոմալիաներից մինչև ավելի վտանգավոր պայմաններ, ինչպիսիք են սրտի որոշ խցիկների կամ փականների բացակայությունը:

Հետազոտողները վերլուծել են ավելի քան 3,5 միլիոն կենդանի ծնվածների տվյալները, որոնք տրամադրվել են Կորեայի առողջության ապահովագրության ազգային ծառայության տվյալների բազայի կողմից: Հաշվի են առնվել 2005-ից 2019 թվականներին ծնված բոլոր երեխաների մասին տեղեկությունները։ 10 տարի շարունակ հետազոտողները հետևել են նորածինների և նրանց մայրերի մոտ քաղցկեղի ախտորոշմանը:

Արդյունքները ցույց են տվել, որ սրտի բնածին արատներով երեխաների մոտ քաղցկեղով հիվանդացությունը 66%-ով ավելի է եղել՝ համեմատած նման պաթոլոգիա չունեցող իրենց հասակակիցների հետ։ Քաղցկեղի ամենատարածված տեսակներն էին լեյկոզը (21%) և ոչ Հոջկինի լիմֆոման (11%): Ավելին, այն մայրերը, ովքեր ծննդաբերել են սրտի արատներով երեխաներ, նույնպես 10 տարվա ընթացքում քաղցկեղով հիվանդանալու հավանականությունը 17%-ով ավելի մեծ է եղել։

Սրտի բնածին արատների և քաղցկեղի միջև կապի հիմքում ընկած մեխանիզմները դեռևս հաստատված չեն: Առաջարկվող բացատրությունները ներառում են գենետիկ նախատրամադրվածություն կամ երկու տեսակի պաթոլոգիաների համար ընդհանուր մուտացիաների առկայությունը:

Թարգմանությունը՝ Մանուել Թամազյանի