Թիրախավորվում են հատկապես այն արցախցիները, ովքեր խոսում են Արցախ վերադառնալու մասին․ Տիգրան Աբրահամյան

Այստեղ հավաքված մարդկանց մեծ թվով հարցեր են միավորում։ Ցավոք սրտի, խնդիրները միայն վերջերս խոշտանգված արցախցու թեմայով չեն պայմանավորված։ Այս մարդկանց հետաքրքրում են մեծ թվով հարցրեր, սկսած՝ սոցիալականից, մարդու իրավունքների պաշտպանությունից, որոնք տարբեր կերպով ՀՀ իշխանությունների կողմից խախտվում են, ավարտված՝ հիմնական քաղաքական մոտեցումներով, որն արտահայտված է, մասնավորապես, արցախցիների՝ Արցախ վերադառնալու իրավունքով։ Այս մասին բողոքի ակցիայի ժամանակ լրագրողների հետ զրույցում ասաց ԱԺ պատգամավոր Տիգրան Աբրահամյանը։

Նա նշեց՝ արցախցիների իրավունքները բոլոր առումներով այսօր խախտված են․ «Հայաստանում վերջին տարիներին խախտվում են ոչ միայն արցախցիների, այլ նաև մեծ թվով ՀՀ քաղաքացիների իրավունքները։ Այսօր Հայաստանում մեծ թվով քաղբանտարկյալների գոյությունը և քաղաքական հետապնդումները ցույց են տալիս, որ այստեղ խնդիրը միայն արցախյանը չէ»,– ասաց Աբրահամյանը։ 

Պատգամավորի կարծիքով՝ «թիրախավորվում են հատկապես այն արցախցիները, ովքեր խոսում են Արցախի հանձնման, Արցախ վերադարձի և արցախցիների նկատմամբ որոշակի առանձնացված մոտեցումների մասին»։

«Իշխանությունը խնդիր ուներ արցախցիներին առանձին խմբերի բաժանելու, բևեռացնելու, որպեսզի նրանք չկարողանային իրենց հավաքական պահանջները ներկայացնել, որպեսզի խլացնեին արցախցիների պնդումներն այս իշխանության քաղաքականության վերաբերյալ, որն, ի վերջո, բերեց Արցախի հանձնմանը»,– ասաց նա։