Պոլսահայ հայտնի երգիչը վիրահատվել է. նրան երիկամ է «նվիրել» հարազատ եղբայրը

Պոլսահայ հայտնի օպերային երգիչ, խմբավար, մանկավարժ,  2015-2016 թվականներին Ստամբուլի Օպերայի և բալետի տնօրեն եղած Գևորգ Դավիթյանը երիկամային հիվանդությամբ երկար տարիներ տառապելուց հետո օրերս երիկամային փոխպատվաստման է ենթարկվել։ Հայտնի երգչի երիկամի դոնորը հարազատ եղբայրն էր՝ Գրիգոր Դավիթանը։ Այս մասին գրում է «Արևելք»-ը։

Նրանք վիրահատությունից հետո ապաքինման շրջանում են։ Հիվանդանոցում գտնվող Գևորգ Դավիթյանն ասել է․ «Վիրահատությունը հաջող էր։ Երիկամի փոխպատվաստումից հետո բոլոր կենսական գործառույթները նորմալ վերադարձել են։ Հուսանք, որ այս դժվարին գործընթացը լավագույնս կավարտենք։ Իմ հերոսը, իմ սիրելի եղբայրը նույնպես անչափ լավ է։ Շատ շնորհակալ եմ այս գործընթացի ընթացքում մեզ հետ այդքան ամուր կանգնած լինելու համար: Անսահման շնորհակալություն բարոյականության և աջակցության հաղորդագրությունների համար: Անսահման շնորհակալություն սիրելի եղբորս՝ այս երկրորդ հնարավորության, այս երկրորդ կյանքի համար։ Ողջույն և սեր, առողջ օրեր»։

Գևորգ Դավիթյանը ծնվել է 1968 թվականին, Ստամբուլում: 1996 թվականին ավարտել է Սինան ճարտարապետի անվան համալսարանին կից կոնսերվատորիայի օպերայի բաժինը։ 1998 թ. ընդունվել է Ստամբուլի օպերայի և բալետի թատրոնի երգչախումբ` որպես մենակատար։ Խաղացել է բազմաթիվ օպերային ներկայացումներում, հանդես է եկել նաև իբրեւ մեներգիչ։