Եկեք վստահ չլինենք, որ բոլորի ընկալմամբ հայկական կողմն իրեն «սրբորեն» է պահում․ Ալեն Սիմոնյան

Չեմ կարծում՝ Ադրբեջանի և Հայաստանի միջև խաղաղության գործընթացը փակուղի է մտել, երևի թե ադրբեջանական կողմի համար մի փոքր անսպասելի էր մեր կողմից առաջարկը ստորագրելը։ Կարծում եմ՝ նրանց մամուլում տեղ գտած կրակոցների վերաբերյալ հաղորդագրություններն առաձին հետաքննության առիթ են և կարող են երկկողմ հետաքննության առիթ հանդիսանալ, և այդ ուղղությամբ աշխատանքներ են տարվում, որպեսզի հետագայում հնարավոր լինի նման բաներից խուսափել։ Այս մասին լրագրողների հետ զրույցում ասաց ԱԺ նախագահ Ալեն Սիմոնյանը։

Սիմոնյանը վստահեցրեց, որ միակողմանի զիջումների մասին խոսք անգամ չի կարող գնալ․ «Ոնց կարող է միակողմանի լինել, եթե բոլորը դրույթները վերաբերում են երկու կողմին։ Նրանք, ովքեր նման հայտարարություններ են անում, թող գան իմ դիմաց կանգնեն կամ ամբիոնից ելույթ ունենան, և փորձեն իրենց ասածը հիմնավորել»,– հավելեց ԱԺ նախագահը։

Նա նշեց՝ եկեք վստահ չլինենք, որ բոլորի ընկալմամբ հայկական կողմն իրեն սրբորեն է պահում, որվհետև «նույն ադրբեջանական կողմը հակառակ կարծիքն ունի, բողոքում է և նեղսրտում է հայկական կողմի պահվածքից, հայ քաղաքական գործիչների հայտարարություններից և այլն»։