Սրանք 30 արծաթով պաշտոն պահող են, այսօր նյութի ու գաղափարի կռիվ է. Շարմազանով

Այսօր լրանում է ՀՀԿ նախագահ Անդրանիկ Մարգարյանի մահվան 18-րդ տարելիցը։ Կոմիտասի անվան պանթեոնում Անդրանիկ Մարգարյանի շիրիմին ծաղիկներ է խոնարհել նաև ՀՀԿ նախկին պատգամավոր Էդուարդ Շարմազանովը և պատասխանել լրագրողների հարցերին։

«Ես ինձ համարում եմ Անդրանիկ Մարգարյանի գործի շարունակողը, նրա աշակերտը, կրտսեր ընկերը։ Ես քաղաքականության մեջ իմ առաջին քայլերն իրականացրել եմ Անդրանիկ Մարգարյանի ղեվարարությամբ, քաղաքականություն եմ մտել նրա ղեկավարությամբ և շնորհիվ նաև։ Եթե չլիներ Անդրանիկ Մարգարյանը, հարց է՝ քաղաքական գործիչ Էդուարդ Շարմազանովը կլինե՞ր, թե՝ ոչ»,– ասել է Շարմազանովը։

Քաղաքական գործչի խոսքով՝ պետք է հետևել Անդրանիկ Մարգարյանի և նրա ընկերների արժեքային համակարգին, պայքարի անկոտրուն ոգուն։ «Անդրանիկ Մարգարյանը և իր ընկերները դեռևս 60–ականներից պայքարել են անկախության գաղափարի համար»,– հավելել է Շարմազանովը՝ նշելով, որ պետք է գաղափարներին, սեփական սկզբունքներին չդավաճանել։

«Այս աշխարհը նյութի և գաղափարի կռիվ է։ Մարդ կա 30 արծաթն է ընտրում, մարդ էլ կա՝ գաղափարը։ Անդրանիկ Մարգարյանը և իր ընկերները, այդ թվում՝ նաև ես, ընտրել ենք ազգային պետականություն ունենալու գաղափարը, նժդեհյան գաղափարախոսությունը, ազգի հավիտենականությունը, սրանք էլ ընտրել են 30 արծաթի շնորհիվ պաշտոն ունենալը և աթոռը պահելը»,– նշել է նա։