ՀՀ իշխանությունը թացքնում է առաջնագծում առկա օբյեկտիվ իրադրությունը․ Տիգրան Աբրահամյան

Ադրբեջանը չի ստորագրում Հայաստանի հետ բանակցված փաստաթուղթը, որովհետև հայաստանյան իշխող ուժի պարտվողական քաղաքականության հետևանքով վերջինիս քաղաքական ախորժակը զգալիորեն բացվել է։ Ներկայումս Ադրբեջանը վերախմբագրում է Հայաստանին իջեցվող պահանջների հերթական խմբաքանակը, իր իսկ գործողությունների լրջությունն ի ցույց դնելու նպատակով լարվածություն է հրահրում առաջնագծում։ Այս մասին հայտարարեց ԱԺ պատգամավոր Տիգրան Աբրահամյանը։

Նրա խոսքով՝ Ադրբեջանը սահմանագծին լարվածություն հաղորդելով հետևյալ խնդիրներն է լուծում․

«Առաջին՝ Ադրբեջանը սպառնում է, որ Հայաստանի կողմից իր նոր նախապայմանների չկատարումը առաջնագծում կմեծացնի լարվածությունը՝ իր հետ բերելով սադրանքի և ագրեսիայի տարբեր դրսևորումներ։

Երկրորդ՝ սահամանամերձ բնակավայրերի դեմ ահաբեկչական գործիքակազմ կիրառելով՝ փորձում է ազդեցություն ապահովել հայ հասարակության վրա։

Երրորդ՝ 44–օրա պատերազմի, ՀՀ–ի դեմ իրականացված ագրեսիաների և օկուպացման քաղաքականության հետևանքները չմարսած՝ Ադրբեջանը փորձում է հոգեբանական գրոհներ իրականացնել ՀՀ զինված ուժերի վրա»։

Ընդդիմադիր պատգամավորը նշել է, որ իրավիճակն առավել անկանխատեսելի և անորոշ է դարձել, քանի որ ՀՀ իշխանությունը հրաժարվում է հրապարակայնություն ապահովել ստորագրման ենթակա փաստաթղթի հարցում՝ ահագնացնելով հանրության այն սպասումները, որ Հայաստանի համար հերթական կապիտուլյացիան է նախապատրաստվում։

«ՀՀ իշխանությունը թացքնում է առաջնագծում առկա օբյեկտիվ իրադրությունը և հանրությանը որևէ էական տեղեկություն չի փոխանցում կուլիսներում ընթացող շփումների մասին»,– ասաց նա։