Կաթնաթթվային բակտերիաները պաշտպանում են արգանդի վզիկի քաղցկեղից. Պարզել են գիտնականները

Կյունփուկի ազգային համալսարանի գիտնականները պարզել են, որ հեշտոցում գտնվող կաթնաթթվային բակտերիաները կանխում են ցողունային բջիջների վերածումը չարորակների՝ նվազեցնելով արգանդի վզիկի քաղցկեղի առաջացման վտանգը։ Հետազոտության արդյունքները հրապարակվել են Nature Communications (NatCom) ամսագրում:

Արգանդի վզիկի քաղցկեղն աշխարհում չորրորդ ամենատարածված քաղցկեղն է կանանց շրջանում, որտեղ տարեկան գրանցվում է մոտավորապես 600,000 դեպք: Հիմնական պատճառը մարդու պապիլոմավիրուսն է (HPV), որի որոշ շտամներ ունեն առողջ բջիջների ԴՆԹ-ի քրոմոսոմները վնասելու հատկություն։

Նոր հետազոտության ընթացքում գիտնականները կենտրոնացել են կաթնաթթվային բակտերիաների վրա: Հայտնի է, որ դրանք կանանց հեշտոցի ամենաառատ օգտակար բակտերիաներն են: Նախկին գիտական ​​հետազոտությունները ցույց են տվել, որ կաթնաթթվային բակտերիաները ճնշում են արդեն զարգացած քաղցկեղային բջիջները։

Պարզելու համար, թե արդյոք այդ բակտերիաները կարող են կանխել նախաքաղցկեղային պրոցեսները, գիտնականները փորձ են անցկացրել թուլացած իմունային համակարգ ունեցող մկների վրա։ Կենդանիներին փոխպատվաստել են մարդու արգանդի վզիկի ցողունային բջիջներ։ Արդյունքները ցույց են տվել, որ կաթնաթթվային բակտերիաները արտազատում են թթու, որը խանգարում է HPV-ի ազդեցությանը և արգելակում է ոչ միայն նորմալ ցողունային բջիջների ինքնավերարտադրությունը, այլև ցողունային բջիջները քաղցկեղի բջիջների վերածելու սկզբնական գործընթացը:

Գիտնականները նաև պարզել են, որ D-կաթնաթթուն ճնշում է նորմալ և նախաքաղցկեղային օրգանելների աճը, իսկ L-կաթնաթթունը՝ ոչ։ Հետազոտողները նշում են, որ հայտնագործությունը կարող է ապագայում հանգեցնել մարդկանց արգանդի քաղցկեղի բուժման նոր մեթոդների:

Թարգմանությունը՝ Lurer.com-ի