Փաշինյանը խոսել է Հայաստանում տեղի ունեցած «չափազանց կարևոր իրադարձության» մասին

Մարգարայի անցակետի բացումը կարևոր իրադարձություն է, բայց աննախադեպ չէ: Ես չէի ուզենայի այդ իրադարձությունը թերագնահատեինք, բայց չէի էլ ցանկանա, որ գերագնահատեինք: Այդ մասին ԱԺ-Կառավարություն հարցուպատասխանի ժամանակ ասաց ՀՀ վարչապետ Նիկոլ Փաշինյանը՝ հիշեցնելով, որ 2023 թվականի հունվարին նույնպես անցակետը բացվել է, որպեսզի ՀՀ Կառավարության կողմից ուղարկվող հումանիտար օգնությունը հասնի Թուրքիա` երկրաշարժի գոտի: 

Նա նաև խոսեց Հայաստանում տեղի ունեցած «չափազանց կարևոր իրադարձության» մասին, որին, ըստ նրա, հանրությունն այնքան էլ մեծ ուշադրություն չի դարձրել։

«2025 թվականի մարտի 1-ի դրությամբ ՀՀ մուտքի և ելքի բոլոր կետերը գտնվում են ՀՀ սահմանապահ զորքերի վերահսկողության ներքո, և սա չափազանց կարևոր իրադարձություն է, որն արժե ընդգծել:

Ես ուզում եմ ևս մեկ անգամ շնորհակալություն հայտնել ՌԴ ԱԴԾ սահմանապահ զորքերին անկախությունից ի վեր այդ գործառույթը մեր սահմանային անցագրային կետերում իրականացնելու համար, և գոհունակություն հայտնել, որ մենք այլևս ի վիճակի ենք այդ ինքնիշխան գործառույթն իրականացնել»,- նշեց Փաշինյանը