Շարունակվելու են արցախցիների իրավունքների պաշտպանության հարցով ակցիաները

Արցախցիների իրավունքների պաշտպանության խորհուրդը հայտարարություն է տարածել․
 

«Արցախցիների իրավունքների պաշտպանության խորհրդի նախաձեռնությամբ՝ մարտի 31-ին, ՀՀ աշխատանքի և սոցիալական հարցերի նախարարության դիմաց անցկացվեց ակցիա։
 

Ակցիայի նպատակը Արցախից բռնի տեղահանվածների սպասվող սոցիալական ճգնաժամի մասին իրազեկումն ու Խորհրդի սոցիալական բնույթի պահանջների մանրամասների ներկայացումն էր:
 

Ակցիայի շրջանակներում ելույթով հանդես եկավ Խորհրդի անդամ, Արցախի մայրիկների աջակցման կենտրոն ՀԿ ղեկավար Մարիամ Աբրահամյանը Mariam Abrahamyan։ Նա հակիրճ ներկայացրեց սոցիալական ոլորտի առաջնային հիմնախնդիրները՝ ընդգծելով, որ բնակարանային և զբաղվածության ծրագրերը պետք է նշանակալիորեն բարելավվեն՝ հաշվի առնելով արցախյան քաղհասարակության մտահոգություններն ու առաջարկները:

Ելույթից հետո ակցիայի մասնակիցները գրություններ արեցին նախարարության դիմաց` շեշտադրելով, որ բնակապահովման ծրագիրը պետք է համապատասխանեցվի շահառուների կարիքներին՝ մինչ այդ շարունակելով բնակվարձի աջակցության ծրագիրը։
 

Նախարարությունից հրավիրեցին ակցիային մասնակցող Խորհրդի չորս անդամի, որոնք ներկայացրեցին Խորհրդի դիրքորոշումներն ու պահանջեցին արագ ու ներառական որոշումների կայացում ներկայացված հարցերի վերաբերյալ:
 

Հավելենք, որ Արցախցիների իրավունքների պաշտպանության խորհրդի կողմից շարունակվելու են փոքր ու տեղային ակցիաները տարբեր թեմաներով, որոնց վերաբերյալ կտրվեն լրացուցիչ տեղեկություններ»: