Ինչ ուտել մազերի աճի համար․ սննդաբանի խորհուրդները

Մազերի աճի համար հիմնական բաղադրիչը սպիտակուցն է, որի օրական պահանջը տղամարդկանց համար կազմում է 56 գ, իսկ կանանց համար՝ 45 գ: Գեղեցիկ սանրվածքի պահպանմանն օգնում են նաև B վիտամիններն ու երկաթը։ Այս մասին Daily Mail-ին ասել է լոնդոնցի սննդաբան Էմեր Դելեյնին։

Մասնագետը պարզաբանել է, որ երբ օրգանիզմում սպիտակուցը քայքայվում է, առաջանում են ամինաթթուներ՝ օրգանական միացություններ, որոնք կենսական նշանակություն ունեն մազերի աճի և ամրացման համար։ Սպիտակուցը կարելի է գտնել ոչ միայն մսի և ձվի մեջ, այլ նաև բուսական սննդի մեջ, ինչպիսիք են տոֆուն կամ սոյան:

«B խմբի վիտամինները, հատկապես ֆոլաթթուն (վիտամին B9) և վիտամին B12-ը, կարող են նաև խթանել բջջային մետաբոլիզմին և արյան հոսքին դեպի գլխամաշկ»,- հավելել է սննդաբանը:

Ֆոլաթթու պարունակվում է այնպիսի մթերքներում, ինչպիսիք են ոսպը, ցիտրուսային մրգերը, կանաչ տերևավոր բանջարեղենը և ձուն: Վիտամին B12-ով հարուստ են կենդանական ծագման մթերքները՝ միս, ձուկ, ձու և կաթնամթերք:

Առողջ մազերի համար երրորդ հիմնական բաղադրիչը երկաթն է: Այս մետաղը կապում է թթվածնի ատոմները և որպես հեմոգլոբինի մի մաս, դրանք տեղափոխում է թոքերից բոլոր հյուսվածքները: Թթվածնի պակասը հանգեցնում է նրան, որ բջիջները (ներառյալ մազի ֆոլիկուլային բջիջները) «սովամահ են լինում», ինչը դժվարացնում է նրանց բաժանումը: Բժիշկը հիշեցրել է, որ երկաթ կա կարմիր մսի մեջ։