Սա առաջին դեպքը չէ, որ պետական արարողակարգից ելնելով՝ կաթվածահար են անում մարդկանց առօրյան. Մելոյան

Abc Media-ն զրուցել է երեկվա տեսանյութի՝ բռնության ենթարկված քաղաքացու հետ:

Տղամարդը շտապել է իր պապիկի թաղմանն ու ի հակառակ ՆԳՆ հաղորդագրությանը՝ տեղեկացրել է, որ հայհոյանք չի հնչեցրել, միայն ազդանշանել է (անգամ, եթե հայհոյանք հնչեցներ, պարեկն իրավունք չունի տղայական ռազբորկայի ոճով հարձակվելու քաղաքացու վրա, ինքն այն իրավասուներից է, ով կարգավորում ու կանխարգելում է այդ փողոցային վարքագիծը): Այս մասին Ֆեյսբուքի իր էջում գրել է սահմանադրագետ Գոհար Մելոյանը:

«Մոտ 25 րոպե երթևեկությունը կանգնեցրել են:

25 ր Կառլ:

Սա ևս անփույթ աշխատանքի հետևանք է:

Պարեկային ծառայությունը պարտավոր է այդ անցուդարձի օպերատիվությունն ապահովել, որը տեւում է յուրաքանչյուր խաչմերուկում՝ 5-10 րոպե, ոչ թե իրենց ապահովագրելու համար մարդկանց կես ժամ կանգնեցնեն։

Եվ սա առաջին դեպքը չէ, որ պետական արարողակարգից ելնելով՝ կաթվածահար են անում մարդկանց առօրյան:

Նաև առաջին պաշտոնյաները չեն, որ երթևեկում են մեր երկրում։ Անգամ այս հարցում են ոչ պրոֆեսիոնալ ու մարդկանց համար սթրեսային իրավիճակներ ստեղծող:

Լուսահոգի Սոնա Մնացականյանի անհետևանք մնացած միջադեպը՝ վառ վկայություն»,- գրել է նա:

Հիշեցնենք, որ  համացանցում տեսանյութ է տարածվել, որտեղ երևում է, թե ինչպես են  Երևանում խցանման մեջ սպասող վարորդին պարեկներն անհասկանալի պատճառով հանում մեքենայից, ուժ գործադրելով՝ պառկեցնում գետնին, այնուհետև տանում անհայտ ուղղությամբ։

Ավելի ուշ ՆԳՆ-ն պարզաբանում էր տարածել: