ՀՀ ԱԳ փոխնախարարը և Կատարի ԱԳ պետնախարարը քննարկել են Հայաստանի և Կատարի միջև փոխգործակցության հարցեր

Ապրիլի 3-ին ՀՀ ԱԳ նախարարի տեղակալ Վահան Կոստանյանը հանդիպել է Կատարի Պետության արտաքին գործերի պետնախարար Սուլտան բին Սաադ Ալ-Մուրեյխիի գլխավորած պատվիրակության հետ: Այս մասին տեղեկացնում են ԱԳՆ-ից:

Զրուցակիցները քննարկել են Հայաստանի Հանրապետության և Կատարի Պետության միջև փոխգործակցության հարցերի լայն շրջանակ:

Հանդիպման սկզբում կողմերը գոհունակությամբ նշել են երկու երկրների միջև առկա քաղաքական երկխոսության բարձր մակարդակը` փոխադարձաբար ընդգծելով տնտեսական, ներդրումային, զբոսաշրջային և մշակութային ոլորտներում փոխգործակցության խթանման հրամայականը: Երկուստեք կարևորվել է ռեզիդենտ դեսպանությունների գործունեությունը երկկողմ օրակարգի զարգացման գործում և պայմանավորվածություն ձեռք բերվել կրկնապատկել ջանքերը՝ էլ ավելի ընդլայնելու հարաբերությունների հարուստ օրակարգը թե՛ երկկողմ և թե՛ բազմակողմ հարթակներում:

Նախարարի տեղակալ Կոստանյանը շնորհակալություն է հայտնել Կատարի Պետության արտաքին գործերի նախարարության կողմից «Հայաստանի Հանրապետության և Ադրբեջանական Հանրապետության միջև խաղաղության և միջպետական հարաբերությունների հաստատման մասին համաձայնագրի» տեքստի վերջնականացման ողջունումը, ինչպես նաև բարձր է գնահատել Կատարի  բարձրագույն ղեկավարության կողմից ՀՀ Կառավարության որդեգրած «Խաղաղության խաչմերուկ» ծրագրի նկատմամբ ցուցաբերած հետաքրքրությունը:

Մտքեր են փոխանակվել Հայաստանի Հանրապետության և Ծոցի համագործակցության խորհրդի անդամ երկրների հետ համագործակցության խորացման ուղիների վերաբերյալ:

Հանդիպման ավարտին զրուցակիցներն անդրադարձել են նաև փոխադարձ հետաքրքրություն ներկայացնող միջազգային և տարածաշրջանային օրակարգի մի շարք հարցերի։