ՀՀ-ն դիմագրավում է սպառնալիքներին, միասնական լինենք հայության իրավունքների պաշտպանության շուրջ․ ՀՅԴ

ՀՅԴ հիմնադրման 134ամյակին նվիրված տոնակատարություն է անցկացվել Լոս Անջելեսում․

«ՀՅԴ Արեւմտեան Ամերիկայի Կեդրոնական կոմիտէին կազմակերպութեամբ՝ 29 Մարտին, Սրբոց Նահատակաց Ֆերահեան Ազգային վարժարանի «Աւետիսեան» սրահին մէջ տեղի ունեցաւ ՀՅԴ հիմնադրութեան 134ամեակին նուիրուած տօնակատարութիւնը՝ հայութեան իրաւունքներու պաշտպանութեան նպատակին շուրջ համախմբելով համայնքը։

Տօնակատարութեան ներկայ էին առաւել քան 600 անձեր, որոնց շարքին՝ Արեւմտեան Ամերիկայի Հայոց թեմի առաջնորդ Գեղամ արք. Խաչերեան եւ Ազգային վարչութեան անդամներ, Կեդրոնական Ազգային վարչութեան անդամ Կայծակ Զէյթլեան, ՀՅԴ Բիւրոյի անդամ Տարօն Տէր Խաչատուրեան, ինչպէս նաեւ ՀՕՄի, ՀՄԸՄի Կեդրոնական եւ Շրջանային վարչութիւններու ներկայացուցիչները ու Հայ Մշակութային հիմնարկութեան, Արեւմտեան Ամերիկայի Հայ Դատի, Ազգային վարժարաններու Խնամակալ մարմինի, ՀԵԴի, ՀԵԴ Կրտսերներու, Համազգային վարչութիւններու եւ ՀՅԴ կոմիտէներու անդամներ։

ՀՄԸՄի սկաուտներուն կողմէ կատարուած դրօշակի արարողութենէն ետք, հանդիսավար Նորա Չափարեան իր բացման խօսքին մէջ շեշտեց ՀՅԴի նուիրուածութիւնը Հայկական Հարցին եւ հայութեան նեցուկին շնորհիւ անոր արձանագրած յաջողութիւնները նշեց։

Առաջնորդ Գեղամ արք. Խաչերեան իր օրհնութիւնը փոխանցեց եւ դրուատեց ՀՅԴի մատուցած ծառայութիւնները եւ իրագործումները, յաջողութիւն մաղթելով անոր ապագայ նախաձեռնութիւններուն մէջ։

Այնուհետեւ, օրուան գլխաւոր բանախօսը՝ ՀՅԴ Արեւմտեան Ամերիկայի Կեդրոնական կոմիտէի ներկայացուցիչ Կարօ Մատէնլեան, նախ կանգ առաւ կուսակցութեան պատմութեան ընթացքին արձանագրած իրագործումներուն վրայ՝ Հայաստանի եւ Սփիւռքի տարածքին, որմէ ետք ան խօսեցաւ հայութեան դիմագրաւած մարտահրաւէրներուն մասին՝ շեշտելով համակարգուած եւ համախմբուած ձեւով անոնց դէմ դնելու կարեւորութիւնը, յատկապէս երբ Հայաստան կը դիմագրաւէ Թուրքիոյ եւ Ատրպէյճանի շարունակուող սպառնալիքները, որոնք գոյութենական վտանգի տակ կը դնեն մեր հայրենիքը։

Ան յոյժ կարեւոր նկատեց Հայաստանի ապահովութիւնը երաշխաւորելու քայլերը, Արցախի հայութեան վերադարձի եւ ինքնորոշման իրաւունքներուն ապահովումը, Պաքուի մէջ պահուող հայ գերիներու ազատ արձակման երաշխաւորումը եւ մեր համայնքին համախմբումը, բոլորը հրաւիրելով՝ միանալու հայութեան իրաւունքներուն տիրանալու ՀՅԴի յառաջ մղած այս պայքարին։

Ելոյթ ունեցաւ նաեւ ՀՅԴի երկրամեայ անդամ Յովիկ Սալիպա, որ խօսելէ ետք Հայաստանի, Արցախի եւ Սփիւռքի ու յատկապէս Արեւմտեան Ամերիկայի մէջ ՀՅԴի ժառանգութեան մասին՝ բեմ հրաւիրեց յեղափոխական երգերու մեկնաբան Գառնիկ Սարգիսեանը՝ խանդավառելու ներկաները, որոնք կանուխ առաւօտեան ժամը 3ին հեռացան սրահէն։

Մթնոլորտէն խանդավառուած՝ շարք մը համակիրներ առատաձեռն նուիրատուութիւններ կատարեցին։ Տեղի ունեցաւ նաեւ ՀՅԴի հիմնադիրներու դիմանկարներով պատրաստուած մետաղադրամներու վիճակահանութիւնը. աճուրդի համար դրուած էին Նազանի Նուրեան Նազանեանի երկու ստեղծգործութիւնները եւ Ջասիկ Ջարահեանի նուիրած Արցախի տարբեր շրջաններու նկարներու մետաղադրամներու հաւաքածոն։

ՀՅԴ հիմնադրութեան 134ամեակին նուիրուած երեկոն անգամ մը եկաւ եկաւ փաստելու կուսակցութեան ունեցած կենսական դերակատարութիւնը հայութեան իրաւունքները պաշտպանելու եւ ազգային նպատակներուն հասնելու պայքարին մէջ»։