Փաշինյանի կամակատար դատավորը «լայեղ չարեց» լսել ԱԺ պատգամավորներին ու գեներալներին

Արդարադատությունը Հայաստանում այսօր հերթական ծանր պարտությունը կրեց։ Այսօր՝ ապրիլի 4-ին, Ավան և Նոր Նորք վարչական շրջանների ընդհանուր իրավասության առաջին ատյանի դատարանում տեղի ունեցավ Գագիկ Սարգսյանի և մյուսների գործով դատական հերթական նիստը։ Վկայի հարցաքննությունից հետո մեղադրող դատախազը միջնորդություն ներկայացրեց դատարանին մեղադրյալներ Գագիկ Սարգսյանի, Վահագն Հովհաննիսյանի և Արշամ Գալստյանի կալանքի ժամկետը ևս երեք ամսով երկարացնելու վերաբերյալ՝ հայտարարելով, թե խափանման միջոց կալանքի հիմքերը մնում են նույնը։ Նիստերի ընթացքում դերասանական մեծ տաղանդով և հատկապես Գագիկ Սարգսյանի նկատմամբ թունոտ ու թշնամական վերաբերմունքով աչքի ընկնող դատախազը պնդում է, թե ազատ արձակվելու դեպքում կամ այլընտրանքային խափանման միջոցների կիրառման պարագայում նրանք իբրև թե կարող են խոչընդոտել դատաքննությանը կամ ազդել գործով վկաների կամ նույն գործով 2024թ.   մարտ ամսին կալանավորված, սակայն քննիչներին ցանկալի ցուցմունքներ տալու համար մի քանի ամիս անց ազատ արձակված, այժմ՝ առանձնացված գործով մեղադրյալի կարգավիճակ ունեցող Էդուարդ Պետրոսյանի վրա, որն այսպես կոչված՝ «ՔՊ-ի դեմ ահաբեկչության» գործով այս պատմության միակ ռեալ հանցանք գործողն է։ Հենց նա է 2024թ. փետրվարի 10-ին պայթուցիկ նետել ՔՊ պատգամավոր Գագիկ Մելքոնյանի հարևանի բակ, բայց նախաքննության մարմինները չգիտես՝ ինչու առանձնացրել են նրան հիմնական գործից։

Այսօրվա դատական նիստին ներկա էին նաև Ազգային ժողովի «Հայաստան» խմբակցության պատգամավորներ Գեղամ Մանուկյանը, Արգիշտի Գևորգյանը, ԱԺ «Պատիվ ունեմ» խմբակցության ղեկավար Հայկ Մամիջանյանը և իրավապահ համակարգի երկու անվանի գեներալներ՝ արդարադատության գեներալ-մայոր Թաթուլ Պետրոսյանը և ոստիկանության գեներալ-մայոր Գագիկ Համբարձումյանը, որոնք եկել էին իրենց ստորագրություններով դատարանին երաշխավորելու, որ Գագիկ Սարգսյանի նկատմամբ այլընտրանքային խափանման միջոց կիրառելու դեպքում նա չի խոչընդոտի քննությանը և չի խուսափի դատական նիստերից։ Սակայն դատավոր Արմինե Մելիքսեթյանը, անտեսելով Գագիկ Սարգսյանի պաշտպան Մկրտիչ Դավթյանի ներկայացրած բոլոր փաստարկներն ու հիմնավորումները, նաև նրա կողմից ներկայացրած միջնորդությունն ու պատգամավորների և գեներալների երաշխավորությունը, բավարարեց դատախազի միջնորդությունը՝ երկարացնելով Գագիկ Սարգսյանի կալանքը ևս երեք ամսով։ Երեք ամսով երկարացվեցին նաև Վահագն Հովհաննիսյանի և Արշամ Գալստյանի կալանքի ժամկետները։ Սույն դատավորը, ժողովրդական լեզվով ասած, «լայեղ չարեց» նույնիսկ լսելու Գագիկ Սարգսյանի համար երաշխավորելու եկած ԱԺ պատգամավորներին ու գեներալներին։ Երբ որոշումն ընթերցելու ժամանակ պաշտպան Մկրտիչ Դավթյանը հայտարարեց, որ նրանք ցանկանում են ներկայանալ դատարանին և իրենց խոսքն ասել, դատավոր Արմինե Մելիքսեթյանը քամահրական շպրտեց. 
«Մի՛ ընդհատեք»։ Ինչով, իհարկե, հերթական անգամ հաստատեց, որ պարզապես կատարում է ամենավերևից եկած հրամանը` կատարել դատախազի բոլոր հրահանգները և ամեն կերպ պահել Գագիկ Սարգսյանին ու մյուսներին անազատության մեջ։ Իսկ թե արդյոք այս ամենը քրեադատավարական նորմերի կոպտագույն խախտում և արդարադատության ոտնահարում չէ, դա էլ թողնում ենք իրավագետների մասնագիտական գնահատականին ու դատավոր Արմինե Մելիքսեթյանի խղճին։

Արամ Սարգսյան