ՔԿԾ ծառայողների կողմից «Նուբարաշեն» ՔԿՀ-ում ազատազրկված անձանց ծեծի դեպքով քրվարույթ չի նախաձեռնվել․ «Փաստինֆո»

ՔԿԾ հատուկ նշանակության բաժնի ծառայողների կողմից «Նուբարաշեն» ՔԿՀ-ում ցմահ դատապատյալների նկատմամբ խոշտանգման դեպքով քրեական վարույթ չի նախաձեռնվել, փոխարենը՝ քրեական վարույթ նախաձեռնվել է ՔԿՀ-ում անկարգության վերաբերյալ։ Քննչական կոմիտեից «Փաստինֆո»-ի հետ զրույցում հայտնեցին, որ «Նուբարաշեն» ՔԿՀ-ում տեղի ունեցած դեպքի առթիվ ՀՀ ՔԿ ԵՔՔՎ Էրեբունի և Նուբարաշեն վարչական շրջանների քննչական բաժնում ՀՀ քրեական օրենսգրքի 327-րդ հոդվածի 1-ին մասով (զանգվածային անկարգություններին մասնակցելը) և 454-րդ հոդվածի 2-րդ մասով (պատիժն ի կատար ածող հիմնարկում կամ ձերբակալվածներին կամ կալանավորվածներին պահելու վայրերում իրականացվող գործունեությունը խոչընդոտելը) նախաձեռնվել է  քրեական վարույթ:

Հիշեցնենք, որ երեկ դիմակավորված անձինք՝ ՔԿԾ հատուկ նշանակության բաժնի ծառայողները, «Նուբարաշեն» ՔԿՀ 5-րդ հարկում բոլոր ցմահ դատապարտյալների «ջարդ են կազմակերպել», ավելին, ինչպես ահազանգել է իրավապաշտպան Ժաննա Ալեքսանյանը՝ դատապարտյալներն արյունլվա ընկած են եղել և անգամ բուժօգնություն չի ցուցաբերվել։